Sydney, Rymphang:
Katkum ki khubor, la ong ba kawei ka khynnah ka la duh noh ia la ka jingim hadien ka jingshah thombor ha u dohkha ‘Shark’ katba ka dang jngi kai ha ki um hajan ka jaka jngohkai kaba pawnam ha ki rud duriaw Shatei jong ka Australia.
Ha katei ka jingjia, la ong ba ki bor pyniaid ki la phah leit ia ki kynhun iarap kyrkieh sha Woorim Beach jong ka Bribie Island, kaba jngai kumba 80 kms (50 mile) na Shathie jong ka Brisbane ha ka por 5 p.m. (0600 GMT) ha ka Lah Sngi U Blei hadien ba la ioh jingtip shaphang ka jingshah dait dohkha jong katei ka khynnah ha katei ka jingjia.
Ki pulit kim shym la pynpaw ia ka rta jong katei ka nongshah thombor wat la ki lad pathai khubor jong ka Australia ki la iathuh paidbah ba katei ka khynnah kaba khlad ka dei kaba dang ha ki rta 17 snem.
U Christopher Potter kum nongshong shnong, u la ong ba katei ka rud duriaw ka dei kaba ju pyndonkam da ki kynhun jngi tang ha ka por mynsngi.
Wat la ki ju tip ba ki don shibun bah ki dohkha ‘Shark’ ha kylleng jong ka Bribie, hynrei ka long pat kaba sngew lyngngoh ba utei u dohkha u don wat sha kitei ki jaka rud jong katei ka duriaw.
