Shillong, Rymphang 04
Ka Rangshken ACC bad ka Sohra Combines ki la ïoh jingjop ha ka 4th District League T20 Cricket Tournament 2024 ba la pynlong da ka East Khasi Hills Cricket Association ha ka Sngi Ba-ar.
Ha kane ka jingïakhun kaba la long ha madan Saitsohpen kaba ha Sohra, ka Sohra Combines ka la pynliem noh ïa ka Royal Rangers CC da 69 run. Ka Sohra Combines ka la kam trai ba kan tied nyngkong ha kaba ka la ïoh 144 run bad shah pynhap 3 wiket ha ki 16 over. U Jona u la tied 42 run na 42 bol. Katba u Kevinstar Khongwar u la shim 2 wiket bad ai 44run na 4 over na ka bynta ka Royal.
Haba wan beh ïa ka thong ba la buh da ka liang pyrshah, ka Royal Rangers ka la ïoh tang 76 run bad shah pynhap 6 wiket ha ki 16 over. U Lalaplad Tariang u la tied 17 run na ki 16 bol. Ïa ka nam ‘Player of the Match’ la ïohpdiang da u Donkyrmenlang Nadon uba la tied 38 run na 29 bol, nangta shim 3 wiket bad ai 9 run ha ki 3 over.
Haba phai sha ka jingïakhun ba ar, ka Rangshken ACC ka la jop da 8 wiket ïa ka Thynroid CC. Ka Thynroid kaba la shimti ban tied nyngkong, ka la ïoh 52 run bad shah pynkhyllem 10 wiket ha ki 14.1 over. U Sandy M Mulong u la tied 10 run na 13 bol. Katba u Kisstar Janong u la shim 4 wiket bad ai 5run ha ki 4 over na ka bynta ka Rangshken.
Haba wan shimti ïa ka pali ba ar, ka Rangshken ACC ka la lah ban kynjoh sha ka thong da kaba ïoh 53 run bad shah pynhap 2 wiket ha ki 6 over. U Kyrmenskhem Nongrum u la tied 20 run na 14 bol. Katba u Kedar War u la shim 1wiket/7 run ha ki 2 over na ka bynta ka Thynroit. Ïa ka nam ‘Player of the Match’ la ïohpdiang da u Kisstar Janong.
