Shillong, Rymphang 04
U Deputy Commissioner ka Ri-Bhoi District, u Abhilash Baranwal u la plie ïa ka prokram ai jinghikai phutbol na ka bynta ki heprit kynthei bad shynrang ba la tip kum ka Winter Football Coaching Camp ha ka Sngi Ba-ar ha madan Mawtnum kaba ha Nongpoh.
Ïa kane ka prokram la ïasnoh kti lang bad ka shlem treikam u District Sports Officer (DSO) Ri-Bhoi. Nalor ha Mawtnum, ha kane ka sngi la lah ban plie ruh ha madan Jatah kaba ha Mawhati, madan Kyrdem kaba ha Bhoirymbong bad ha madan Mawlasnai.
Ha kane ka prokram la wan shim bynta shitrhem da ki khynnah kynthei bad shynrang kiba naduh ka rta kaba 13 haduh 16 snem na ka bynta ban ïoh ka jingshah hikai kaba paka lyngba ki coach jong kane ka shlem kaba la pynkhreh na ka bynta ban saiñdur ïa ka lawei jong ki khynnah ha ka kam ïalehkai phutbol.
