Shillong, Rymphang 12
Ka Real Madrid ka la lah ban pynliem ïa ka Manchester City da 3-2 kol ha ka jingïalehkai ba nyngkong jong ka Champions League (play-off) ha ka Sngi Balang bad kane ka la wan urlong lyngba ka kol khatduh ba la thep da u Jude Bellingham.
Katba ka Paris Saint-Germain ka la lah ban pynliem noh ïa ka kynhun ïalehkai na France ka Brest da 3-0 kol.
Ha kane ka jingïakhun u Erling Haaland u la lah ban thep ar kol ïa ka Man City kiba long ruh ki kol ba nyngkong eh na ki san sien ïakhun na ka bynta ban ailad ïa ka kynhun jong u Pep Guardiola ban lamkhmat ha kane jingïakhun. Tangba, katei ka lahduh jong ka aïom ba la dep ka la wanphai da ka jingkhlaiñ bor na ka bynta ban pynthikna ban jam sha ka pre-quarter final na ka bynta ka wat kaba nyngkong ka ban long ha Spain.
“Ka la long ka jingïalehkai kaba phylla. Ngi la ïalehkai katto-katne ki jingïalehkai phutbol ba kongsan ha kane ka aïom bad ngi la wan ha ki kyrdan ba kham shadien,” la pynpaw u Bellingham hadien ba la kut ka jingïalehkai.
“Ngam sngewthuh ïa ka rukom ïalehkai ka City namar ka dang dei ka kynhun kaba khlaiñ bor. Ka long kaba eh ban ïalehkai pyrshah ïa ki bad khatduh ngi la shim ïa ka kabu kaba biang eh ban ïoh syndon ïa ka jingjop.”
Ka City bad ka Madrid ki la ïakynduh haduh saw sien ha kane ka lympung; ha ki lai tylli ki jingïakhun ba khatduh jong ki, ka nongjop ka la leit sha ka kynhun kaba rah ïa ka nam lahduh jong ka Champions League.
Hadien ba u Josko Gvardiol u la pashat ïa ka bol sha u Jack Grealish, u Haaland u la lah ban pyllait ïa ka bol na ka kti u Thibaut Courtois ban ailad ïa ka City na ka bynta ban pynkhih jar nyngkong ha ka minit kaba 19 ha Etihad.
U Haaland u la shah khanglad noh kawei pat ka kabu ksiar ha ka kylla miet bad u Vinicius Junior jong ka Madrid u la kynjat ïa ka bol ha shwa ba u rangïalehkai shadien jong ka City, u Manuel Akanji un lah ban pyllait na ka jingshah thep.
U Dani Ceballos u la ïoh ïa ka bol na ka bynta ban pynbuh bol ïa u Mbappe u bym shym la pynlehnohei ïa kane ka kabu ksiar ha ka minit kaba 60 na ka bynta ban ïakhaid mar shi kol.
Hadien ba u Ceballos u la kum pynur ïa u Phil Foden, u Haaland u la lah ban thep biang ïa ka kol ba ar ka lyngba ka penalty ha ka minit kaba 80. Hapdeng kane ka jingïakhun u rangïalehkai barim ka City u Brahim Diaz (86) u la lah ban pynphai ïa ka Madrid na ka bynta ban ïakhaid mar 2-2 kol. Hynrei shwa ban wai ka jingïalehkai u Bellingham u la lah ban pynurlong na ka bynta ban pynlong ïa ka Madrid ban ïoh syndon ïa ka jingjop.
Haba phai sha kawei pat ka jingïakhun ha Turin, ka Juventus ka la pynliem noh ïa ka PSV Eindhoven da 2-1 kol.
