Shillong, Rymphang 12
Ha ka sien kaba nyngkong eh ka nongbah Shillong kan pynlong ïa ki ar tylli jingïalehkai bar ri na ka bynta ka kynhun ïalehkai ka ri India, la pynthikna da ka All India Football Federation ha ka Sngi Ba-ar.
Kine ki kynthup ïa kawei ka jingïalehkai paralok pyrshah ïa ka Maldives ka ban long ha ka 19 tarik u Lber bad ka AFC Asian Cup 2027 qualifier pyrshah ïa ka Bangladesh ka ban long ha ka 25 tarik u Lber. Kine baroh ar tylli jingïalehkai kin long ha ka por 7 baje janmiet ha Jawaharlal Nehru Stadium.
Dangshen ha u bnai ba la dep, na ka liang u Match Commissioner ka Asian Football Confederation u la wan ban jurip ïa katei ka stadium bad kumjuh ka jaka kilanmet kaba don ha ka skulbah NEHU bad u la pynpaw ka jinghun mynsiem halor kane ka jingpynkhreh.
Ha ka AFC Asian Cup 2027 qualifiers final round, ka India ka la don ha ka Group-C ha kaba la kynthup lang ïa ka Hong Kong, Singapore bad ka Bangladesh. Kine ki kynhun kin ïakhun pyrshah ha la ïing bad shabar (home & away) haduh u Lber jong u snem 2026. Ki kynhun ki ban long nongjop kin ïoh rung sha ka Asian Cup.
Kumba ka paw kane ka dei ka sien kaba nyngkong ba ka JN Stadium kan pynlong ïa ki jingïalehkai bar ri na ka bynta ki jingïalehkai jong ki shynrang naduh ba la dep ban maramot pynbha ïa ka ha u snem ba la lah. Kane ka stadium kaba lah ban ngiam kumba 15,100 ngut ki paidbah nongpeitkai, ka la lah ban pynlong ïa ki jingïalehkai jong ka Durand Cup ha u snem ba la lah bad ka Indian Super League ha ka taïew ba la lah.
Shwa ban maramot pynbha ïa katei ka stadium kaba la siang kham ha shwa da u phlang plastik, la pynlong ruh ïa ki jingïalehkai I-League la kumba katto katne samoi, kumjuh ka wat kaba khatduh jong ka Indian Women’s League ha u snem 2018, ka U-18 Youth League jong ka AIFF ha u snem 2018 lem bad ki jingïalehkai phutbol jong ka South Asia ha u snem 2016.
