Nongpoh, Rymphang 14
Ki nongïalam jong ka Byrnihat Sports Association (BSA) ha ka janmiet Sngi Thohdieng ki la pynlong ka jingjurip ban khmih ïa ka jingpyntreikam ban pynbha ïa ka madan ïalehkai jong ka seng kaba don ba Lumnongrim Byrnihat ha kaba ka jingpyntrei naduh ki kynroh, ki jaka shong paidbah bad kiwei kiwei de ki bynta ki dang ïaid shaid-shaid.
Kum ban shu kdew hangne, ïa kane ka madan la wan ban buh mawnongrim da u Bah Banteidor Lyngdoh, Myntri barim ka tnat Sports ka jylla ha u snem 2022 bad ïa kane ka madan la mang pisa haduh T. 5.7 klur lyngba ka State Sports Council kum shi bynta ban kyntiew ïa ka kam ïalehkai ha ka thaiñ.
Na ka liang u Bah Wanphrang Lyngdoh, General Secretary jong ka BSA haba kren sha ki lad pathai khubor u la ong ba ka long shisha ka jingkmen bad ka jingkyrkhu kaba khraw ïa ki khun samla jong ka thaiñ, bad ki la ïoh ban pynbha ïa kane ka madan ïalehkai da kaba ai jingïaroh sha u MLA, Bah Sosthenes Sohtun ba dei lyngba ka jingshimkhia jong u ba kane ka kam la urlong hadien bun bun snem jong ka jingphohsniew.
U Bah Wanphrang u la ïathuh ruh kumba long mynta, ka jingpyntrei ïa kane ka madan ka dang ïaid shaid-shaid ha kaba la lah ban pyndep haduh kumba 80% eiei. Nangta, u la pynpaw ruh ïa ka jingkyrmen skhem ba u kontraktor ba pyntrei ïa kane ka madan un shimkhia ban pyndep katkum ka por ba la buh khnang ba ki khun samla ka thaiñ kin ïoh ban bteng biang ïa ka kam ïalehkai ka jong ki ha kane ka madan.
