Jerusalem, Rymphang:
Ka Israel ha ka Sngi Balang ka la byrngem ban sdang ïa ka thma “thymmai” pyrshah ïa ka Hamas bad ban pyntreikam ïa ka jingthmu jong u President ka US u Donald Trump ban pynkynriah noh ïa ki nong Palestine na ka Gaza Strip kaba la shah pynjot lada ki lehnoh kim pyllait ïa ki nongshah rahbor ha kaba kut jong kane ka taiew.
Kane ka jingkren jong u Myntri kam pohïing ka Israel, u Israel Katz, ka la mih shen hadien ba ka kynhun Palestine, ka Hamas, ka la pynpaw ia ka jingpyrshah kaba jur halor katei ka jingthmu jong ka US bad ba ka la dep pynshai ruh ba kan ym pyndem da lei-lei ruh hakhmat ki “jingbyrngem” jong ka US bad ka Israel halor ka jingpyllait ïa ki nongshah rahbor hapoh ka jingïateh kular ba shipor.
Ki nongpynïasuk- ka Qatar bad ka Egypt pat ki dang pynbor ban pynneh bad pyniaid shakhmat ïa ka jingïateh soskular ban sangeh ïasiat noh, kaba la sdang treikam ha u bnai ba la dep, katba ka Hamas pat ka la ong ba u nongïakren ba ha khlieh duh jong ka u don ha Cairo.
Ka jingsangeh thma ka la pynsangeh shibun ïa ka jingïaleh kaba la neh palat 15 bnai bad la ïohi ïa ki mraw Israel ba la shah pyllait ha ki kynhun kiba rit kum ka jingsiew kylliang ïa ki nong Palestine kiba don ha ka jingshah bat jong ka Israel.
Hynrei katei ka jing-iateh, kaba dang don mynta ha ka bynta ba nyngkong kaba 42 sngi, ka la wan hapoh ka jingeh kaba nang jur.
Ki liang kiba ialeh pyrshah, ki bym pat ia mynjur ia ki bynta kiba hadien jong ka jingiateh kular, ki la iakhaii ia ki jingkynnoh ba ki la pynkhein, kaba la pynmih ia ka jingsngewkhia ba ka jingialeh ka lah ban sdang biang.
U Katz u la ong ba ka Israel kan sdang biang ïa ka thma jong ka lada ka Hamas kam lah ban pynlait ïa ki koidi ha ka sngi Saitjaiñ, ha kaba la buh por ban ïakylliang ïa ki koidi kaba hynriew katkum ki kyndon jong ka jingïateh kular.
Ka Hamas, ka la ong ba kan pynsangeh noh ïa ka jingpyllait, da kaba kdew ba ki jingpynkheiñ aiñ jong ka Israel, bad hadien katto katne kynta, U Trump, ula maham ba ka “dujok” kan bthei lada u lehnoh Palestine, um lah ban pyllait ïa “baroh” ki nongshah rahbor, ha katei ka por.
Lada ka jingialeh ka sdang biang, u Katz u la ong, “ka thma Gaza kaba thymmai… kan ym kut khlem ka jingshah rem jong ka Hamas bad ka jingpyllait ia baroh ki nongshah rahbor.”
