Mawkyrwat, Rymphang 16
Ka Mawlangwir Sports Club kan pynhap pyrda noh ïa ka lympung ïalehkai phutbol ba heh duh ha ka thaiñ ba la tip kum ka Mawlangwir Football Invitation Tourna-ment 2024- 25 ha madan Rowell Lyngdoh Stadium kaba ha Saitsnad, Maw-langwir.
Kane ka jingïakhun final kan long ha ka 24 tarik mynta u bnai, kaba dei ka sngi ñiew vote jong ka ilekshon MDC. Ki kynhun ki ban ïaknieh ïa ka nam lahduh kin long hapdeng ka Nongbri Brothers United FC pyrshah ïa ka Benris FC. Ka lahduh ha kane ka lympung kan ïoh khung ïa ka song pisa kaba T. 8 lak tyngka bad kaba wan ba-ar kan ïoh T .4 lak tyngka.
Na ka liang ka Mawlangwir Sports Club lyngba ka Tournament Committee ka la pyntip ba ka dor bai tiket ha katei ka sngi ka long T. 200 tyngka marwei bad kan don ruh ka jingpynkhalai nusip na ka bynta ki paidbah riew ïeit phutbol kaba ka khusnam kan long da ka song pisa ba la dep ban pynkhreh.
