Riyadh, Rymphang:
Ka Saudi Arabia kan ialam ïa ki nongïalam jong saw tylli ki ri Arab ha ka jingïalang ka ban long ha ka 20 tarik u Rymphang ban ïakren halor ka jingtyrwa jong u Donald Trump ban shimti noh ka US ïa ka Gaza.
Ki nongialam ka Egypt, Jordan, Qatar bad ka United Arab Emirates kin iadon bynta ha katei ka jingialang bah ka ban long shwa da ka jingialang jong ka Arab League ha Cairo ha ka 27 tarik Rymphang halor kane kajuh ka mat.
Haba kren khlem da kwah ban pynpaw kyrteng, kawei pat ka tyllong khubor, ka iathuh ba u President jong ka Sorkar Palestine, Mahmud Abbas, un iadon lang ha katei ka jingialang.
U Trump u la pynmih ïa ka jingkynthoh ha ka pyrthei baroh kawei da ka jingtyrwa jong u ïa ka America ban shimti noh ïa ka Gaza Strip bad ban pynkynriah shnong noh ïa palat 2 Million ngut ki nong Palestine shabar jong katei ka nongbah, da kaba kdew ïa ka Egypt lane ka Jordan kum ki jaka ba kitei ki paidbah Palestine kin lah ban leit buhai shnong noh.
