London, Rymphang:
U Myntri Rangbahduh ka UK, Keir Starmer, ha ka Sngi U Blei u la ong ba u long ba la kloi ban phah ia ki shipai ka ri sha ka Ukraine lada ka long kaba donkam ban pyntikna ia ka jingshngaiñ jong ka Britain bad ka Europe. Namar la ju iohi ruh ba ka UK ka long ka nongkyrshan ba radbah jong ka Ukraine naduh ba sdang jong ka jingleit hiar thma ka Russia pyrshah ia ka Ukraine bad kumta la ong ba kane ka jingkren jong ka UK ka pyni ruh ba ka UK ka long kaba la pynkhreh bad kloi ban phah wat da ki shipai na ka bynta ban pyntikna ïa ka jingïada kaba pura na ka bynta ka Ukraine.
U Starmer u la pynthikna ba un ïashim bynta ha ka jingïalang ba hakhlieh duh ka ban long ha Paris ha ka Lah Sngi U Blei ban weng ïa ki jingsngewkhia kiba nang jur halor ka jingpyrshang jong ka US ban pynkut noh ïa ka thma ha Ukraine. U la ong ruh ba un sa ïakynduh ïa u President jong ka America, Donald Trump ha ki sngi ban wan, da kaba bynrap ruh ba ka UK ka don ka bynta ba kyrpang ban pyntikna ba ka Europe bad ka America kin bteng ia ka jing-ïatreilang kaba bun.
Kumjuh, ia ki heh sorkar jong ka Germany, United Kingdom, Italy, Poland, Spain, Netherlands bad Denmark baroh, la khmih lynti ba kin don ha katei ka jingialang ha shwa ka jingdap lai snem jong ka jinghiar thma jong ka Russia ia ka Ukraine ha ka 24 tarik u Rymphang. Ki ri Europe ki dap da ka jingsheptieng ba lada ka Ukraine kan shah pynbor ha ka jingïateh soskular kaba sniew jong ka United States, kane kan pynlong ïa u Putin ba un ioh ïa ka jingjop bad un ioh kurup ia katei ka ri kaba rit, kaba u la leit thombor naduh kaba sdang jong ka thma.
