Shillong, Rymphang 17
Ka Laitjem CC bad ka Cricket Lovers ki la ïoh jingjop ha ka 4th District League T20 Cricket Tournament 2024 ba la pynïaid da ka East Khasi Hills Cricket Association ha ka Lah Sngi U Blei ha madan Saitsohpen kaba ha Sohra.
Ha ka jingïakhun kaba nyngkong, ka Laitjem CC ka la pynliem noh ïa ka Sportopia CC da 6 wiket. Ka Laitjem kaba la jop ïa ka kynting pisa, ka la ailad shwa ïa ka Sportopia ba kan tied nyngkong ha kaba ka la ïoh tang 99 run bad shah pynkhyllem 9 wiket ha ki 20 over. U Macmillan Wahlang u la tied 27 run na ki 40 bol. Katba u Manchester Pathaw u la shim 4 wiket ha ki 4 over.
Haba wan shimti ïa ka pali ba ar, ka Laitjem ka la lah ban kynjoh sha ka thong da kaba ïoh 100 run bad shah pynhap 4 wiket ha ki 11.5 over. U Anthony Pathaw u la tied 41 run na ki 28 bol. Katba u Vickyson Lambert War u la shim 2 wiket na ka bynta 2 over. Ïa ka nam ‘Player of the Match’ la ïohpdiang da u Manchester Pathaw.
Haba phai sha kawei pat ka jingïakhun ba ar, ka Cricket Lovers ka la jop da 146 run ïa ka Thynroit CC. Ka Cricket Lovers kaba la kam trai ban tied nyngkong, ka la ïoh 248 run bad shah pynkhyllem 7 wiket ha ki 20 over. Kane ka la wan urlong lyngba ka jingïalehkai bha u Shavian Blah uba la lah ban khyrwit ïa ka spah run kaba 134 na ki 62 bol. Katba u Aleric Wanswet u la shim 3 wiket na ka bynta 4 over.
Haba wan beh ïa ka thong ba la buh da ka liang pyrshah, ka Thynroit ka la ïoh tang 101 run bad shah pynkhyllem 10 wiket ha ki 16.3 over. U Sandy M Mulong u la tied 21 run na ki 22 bol. Katba u Raj Kishor Yadav u la shim 2 wiket na ka bynta 2 over. Ïa ka nam ‘Player of the Match’ la ïohpdiang da u Shavian Blah.
