Shillong, Rymphang 18
Ka Sohra Combines bad ka Pomshutia ki la ïoh jingjop ha ka 4th District League T20 Cricket Tournament 2024 ba la pynïaid da ka East Khasi Hills Cricket Association ha ka Sngi Ba-ar.
Ha kane ka jingïakhun kaba la long ha madan ïalehkai kaba ha Sohra, ka Sohra Combines ka la pynliem noh ïa ka Marbisu CC da 21 run. Ka Sohra Combines ka la kam trai ban tied nyngkong ha kaba ka la ïoh 126 run bad shah pynkhyllem 6 wiket ha ki 20 over bad u James Marbaniang u la ïoh 34 run na ki 24 bol. Katba u Dapkupar Nongrum u la shim 4 wiket na ka bynta 4 over.
Haba wan beh ïa ka thong ba la buh da ka liang pyrshah, ka Marbisu ka la ïoh tang 105 ruh hadien ba ka la shah pynhap 10 wiket ha ki 16.5 over. U Fervent Rymbai u la khyrwit 58 run na ki 51 bol. Katba u Darius Ranee u la shim 3 wiket na ka bynta 4 over. Ïa ka nam ‘Player of the Match’ la ïohpdiang da u Darius Ranee.
Haba phai sha kawei pat ka jingïakhun ba ar, ka Pomshutia ka la jop da 5 wiket ïa ka Friends United CC. Ka Friends United kaba la shimti ban tied nyngkong ka la ïoh 118 run bad shah pynhap 9 wiket ha ki 20 over. U Precious Nongrud u la tied 27 run na ki 24 bol. Katba u Skhembor Khongbtep u la shim 4 wiket na ka bynta 4 over.
Haba wan shimti ïa ka pali ba ar, ka Pomshutia ka la ïoh tang 121 run bad shah pynhap 5 wiket ha ki 19.2 over. U Felix Savio Kharsati u la tied 30 run na ki 45 bol. Katba u Ernestin Swer u la shim 1 wiket na ka bynta 4 over. Ïa ka nam ‘Player of the Match’ la ïohpdiang da u Skhembor Khongbtep.
