Nongstoiñ, Rymphang 18
Ka Sawlad SC ka la ïoh jingjop ha ka Super Division jong ka NDSA Premier League Football Tournament 2024-25 ba la pynlong da ka Nongstoiñ District Sport Association.
Kane ka nam jop ka la wan hadien ba ka la lah ban pynliem noh ïa ka Khliehmawlieh YC da 1-0 kol ha ka Sngi Ba-ar ha madan New Nongstoiñ. Ïa kane ka shi kol la thep da u Banshembha Ïawren ha ka minit kaba 77 na ka bynta ban ïoh ïa ki lai point.
Haba phai sha ka First Division, ka Nongkhlaw SC ka la lah ban pynliem noh ïa ka Steplanglur SC da 1-0 kol bad ïa kane la thep da u Rayan Thongni ha ka minit kaba 14.
Nangta, haba phai pat sha ka pre-quarter final jong ka Third Division kaba la long ha madan NDSA ha Nongpyndeng, ka Mawkyn -bat SC ka la lah ban pynliem noh ïa ka Risiang da 1-0 kol na ka bynta ban jam sha ka quarter final.
Kawei pat ka kynhun kaba la lah ban pynurlong ban jam sha ka quarter final ka dei ka Nongsoh-pian SC hadien ba ka la lah ban pynliem noh ïa ka Mawlyngdep da 3-1 kol.
Shuh shuh, ka Upper Marskuiñ SC ruh ka la ïoh jingjop da kaba lah ban pynliem noh da 7-6 kol ïa ka Laitkseh lyngba ka tie-breaker hadien ka jingïakhaid ha ka jingïalehkai, katba ka Sohparu SC ka la ïoh jingjop da kaba ka la lah ban pynliem noh ïa ka Mawrusyiar YCC lyngba ka tie-breaker da 6-4 kol hadien ka jingïakhaid ha ka jingïalehkai.
Kumta lyngba katei ka jingjop, ka la pynlong ïa ka kynhun ïalehkai jong ka Mawkynbat, Nongsohpian, Upper Marskuiñ bad ka Sohparu ba kin ïoh ban rung sha ka quarter final jong ka Third Division jong kane ka lympung.
