Toronto, Rymphang:
Ka liengsuiñ jong ka Delta Air Lines, kaba kit ïa 80 ngut ki briew ha ka liengsuiñ – ba kynthup ïa 4 ngut ki nongtrei jong ka liengsuiñ, ka la leit hap bakla ha ka Kad Liengsuiñ jong ka Toronto bad ka la kylla khongpong, ha kaba ym duna ïa ka 18 ngut kiba shong hapoh ki la mynsaw ha kane ka jingjia kaba la jia ha ka Sngi Nyngkong. Ha kane ka jingjia ym shym la don kano- kano ka khubor ba sngewsih, la iathuh ki heh sorkar. Katei ka jingjia, ka la jia, ha ka por ba ka liengsuiñ jong ka Endeavour Air, kaba na Minneapolis jong ka US, ka dang hiar ha Toronto, hadien katto katne kynta, ba ka lyer kaba jur, ka la lynshop ïa katei ka Ri.
Katkum ka video ba la saphriang ha ki rynsan Social Media, la iohi ia katei ka liengsuiñ kaba la kylla noh na ka lynti iaid liengsuiñ hadien ka jingshah tap tap slap. Hapoh katto katne sekhon, lah ban iohi ia ka tdem kaba lieh kaba heh bha kaba mih na katei ka liengsuiñ ha kaba por ba ka la kylla khongpong na ka lynti ïaid kaba ka dei ban iaid.
Ki briew jong ka tnat pynlip ding ki la leit her mar-mar sha katei ka jaka ba hap katei ka liengsuiñ ban ioh ban pynlip noh kloi ia ka ding kaba klang na katei ka liengsuiñ katba ki dang pyrshang pat ban pyllait im ia kiba shong hapoh baroh.
Ha kane ka khubor, la ong ba ia baroh kiba shong hapoh katei ka liengsuiñ kiba la mynsaw, kynthup ïa uwei u khynnah, la pynkit noh sha ki jaka sumar ba marjan la ka long da ka kali kit nongpang ne ka liengsuiñ ‘helicopter’.
Ia ka daw jong katei ka jingjia ym pat lah satia ban ban tip ne ban pynshai bniah hynrei ki bor pyniaid ki dang wad bniah ban lap ia kiba dei khmih ia ktei ka liengsuiñ ha katei ka por.
Kumta ruh la ong ba ka Kad Liengsuiñ jong ka Toronto ka la pynsangeh noh ïa baroh ki liengsuiñ ym duna ïa ka ar kynta hadien katei ka jingjia. Katba mynta ki liengsuiñ ki la sdang biang, ki bor pynïaid jong ka kad liengsuiñ ki la ong ba ki nongleit nongwan ki lah ban sakhi ïa ka jingpynslem kaba slem ha katei hi ka sngi.
