Agartala, Rymphang:
Ha ka jingkhynra kaba jur halor ka jingkhaïi drok, ki nongtrei jong ka thanat East Agartala jong ka Tripura hapoh ka jingïalam jong u Officer-in-Charge u Rana Chatterjee ki la kem ïa saw ngut ki nongkhaïi drok ha ka sngi Ba-ar ha ka jingkhynra kaba kyrpang kaba la pynlong ha ki jaka ba marjan bad ka MBB College bad ka Anandamayee Ashram ha ka nongbah Agartala.
Kitei ki jingkem ki long kum shi bynta jong ka jingpyrshang jong ka jylla ban ïakhun pyrshah ïa ka jingdih drok hapoh ka jingbthah jong u Myntri Rangbah ka jylla u Professor Dr. Manik Saha.
“Ka bor pulit ka trei shitom ban tei ïa ka Tripura kaba lait na u drok, kumba la thmu da u Myntri Rangbah ka jylla. La buh ïa ki briew jong ngi da ka jingpeitngor ban tehlakam ïa ka jingma jong u drok,” ong u heh Pulit ka Sadar Subdivisional u Debaprasad Roy.
Ha kane ka jingkhynra, ki pulit ki la kurup ïa u drok Heroin ba la ñiewbeaiñ, 210 tylli ki synduk die drok, ka pisa T.5,000, bad kawei ka thuk thuk na utei uba la shah kynnoh.
U Roy u la pynthikna shuh shuh ba ka jingïakhih pyrshah ïa u drok kan ïai bteng da ka bor kaba pura.
“Yn leh da kaba tyngeh ïa kito kiba donkti ban khaïi drok. Ym don mano mano ruh ki ban lait,” u la bynrap.
Ki pulit ka jylla ki la pynlong ïa kum kine ki kam pyrshah drok ha kylleng ki distrik bapher bapher, da kaba thmu ban pynduh jait ïa ka jingkhaïi drok bad ban pynthikna ïa ka jingshngaiñ jong ki paidbah.
