Shillong, Rymphang 27
Ka Manchester United ka shem ïalade ha ka jingeh namar ba ka la don ha ka kyrdan ba 15 jong ka Premier League ha kaba kane ka klob ka dang don tang 30 poiñ na 26 tylli ki jingïalehkai mynta ka aïom.
Ka klob ka la shim ïa ka sien jam kaba thymmai bad katkum ka kaiphod kaba la paw dangshen la ong ba kan pynduna noh ha ka rukom ai bam ïa baroh kiba don bynta ha kane ka kynhun ha kaba tang u roti (sandwich) bad ka syrwa (soup) yn pynbiang.
Ïa ki jingbamja sngi ïa kaba la ju ai sha baroh ki nongtrei kane ka klob yn pynsangeh noh ha ka jaka bam (canteen) bad kane kajuh la khmih lynti ba kan treikam hapoh ki jaka kilanmet jong ka klob ha Carrington.
U khlieh duh jong ka INEOS, Jim Ratcliffe, uba la thied ïa ki bhah jong kane ka kynhun mynshem snem u la don ha ka jingïakhun ban tehlakam ïa ka jingpynlut palat khnang ban pynphai biang ïa ka klob ba pawnam sha ka burom barim jong ka. Bad la ïathuh sa 200 tylli ki jingshah weng kam ki dang sahkut, ban pyndap ïa ki jingshah weng kam kiba la jan 100 ngut kiba la wan ha u snem ba la dep.
Ka United ka la hap ban mad ïa ka jinghiar dor kaba khraw naduh ka jingshongthait noh jong u nongpynïaid barim bad u nongïalehkai ba paw jong ka klob u Sir Alex Ferguson, ha kaba ka United ka la hap ban kylliang uwei hadien uwei pat u nongpynïaid na ka bynta ban mih bujli ha ka jaka utei u nongïalam barim uba na Scotland, hynrei kaba sngewsih ka long ba kane ka klob kam shym la lah ban wanphai biang sha ka thong.
Kumba ka long mynta kane ka klob hapoh jingïalam u manager na Portugal u Ruben Amorim ka la nangjan ban shah pynhap noh na kane ka kyrdan jong ka Premier League namar ka jingbym la ban jam shaphrang.
Hynrei na ka liang u Amorim u la khmih lynti ban wanphai da ka jingjop ha kine ki jingïakhun ba dangsah jong kane ka samoi ïalehkai.
