Shillong, Rymphang 28
U rangïalehkai ka North-East United FC, u Redeem Tlang u la pynpaw ba ka Reliance Foundation Development League (RFDL) ka la pynkylla dur ïa ki khynnah bad ki samla kiba dangkhie dangsan ba kin nangkiew shaphrang ha ka kam ïalehkai phutbol ha ka ri.
Nalor ka jingshem-phang ha ka jingïalehkai ba tbit ba ka RFDL ka ai, u Redeem u la pynpaw ka jingsngewnguh ruh halor ka jingplie lad ïa ki nongïalehkai ba kin sngewtynnad ïa ka jingïalehkai phutbol naduh ba ki dang-rit. Une u rangïalehkai ba la 30 snem ka rta, u la ong ba ki lympung ïalehkai kum ka RFDL kim pat don ha ki por khynnah jong u, bad u la pynpaw ka jingsngewkmen ba ki khynnah kiba mynta ki la ïoh ïa kum kane ka lad ban pyni ïa ka sap jong ki.
“Ka long kaba sngew -tynnad ban ïohi ïa ki samla ïalehkai na Meghalaya ba kin ïoh ïa ka jingithuh bad ka por ïalehkai kaba kordor lyngba ka Reliance Foundation Develop -ment League. Kum kine ki jingïakob kim ju don ha ka por ba nga dangrit, bad ka long kaba phylla ba ki khynnah mynta ki ïoh ïa kine ki lad. Ka ailad ïa ki ban mad bad sngewtynnad ïa ka jing-ïalehkai naduh dangrit. Ka RFDL ka ailad ïa ki ban pyni ïa ka sap jong ki ha ka kyrdan ïakhun bad ban kiew kum ki nongïalehkai phutbol,” la bynrap u Tlang.
U Tlang u la ïalehkai na bun tylli ki klob jong ka ISL kum ka NorthEast United FC, FC Goa, bad ka Odisha FC, nalor ba u la long ruh uba kongsan jong ka kynhun ba jop ïa ka NEUFC ha ka Durand Cup ha u snem 2024.
Na ka liang u Tlang u la pynshlur ïa ki ba kim dei ban kynran hapdeng ki jingeh bad ban don beit ka jingshlur na ka bynta ban wanphai sha ka jingïalehkai.
“Ka phutbol ka dei ka jingïalehkai kaba sngewtynnad; kan don beit ki jingkiew bad ki jinghiar. Kaba kongsan ka long kumno phin kiew biang bad ban ïai bteng ha ka ban nang ïai trei shitom. Nga don ha ka jaka kaba nga don mynta namar ngam shym la kynran dien satia”, u la bynrap.
Ka jingïalehkai jong ka RFDL 2024-25 (Shil-long leg) ka la kut noh ha kaba ka Jamshedpur FC ka la pynliem ïa ka Shillong Lajong FC da 4-1 ha madan ïalehkai ha Wahïajer Multipurpose Sports Complex Stadium ha ka Sngi Palei. U Lawmsangzuala u la thep lai kol, katba ïa ka shi kol la thep da u Heerangamba Seram. Na ka liang ka Lajong la pynphai da u Ricky Kharkongor.
Ha ka jingïakhun kaba kham mynshwa ha katei ka sngi, ka Classic FA ka la jop ïa ka NorthEast United FC da 3-0 kol bad u Bharat Lairenjamu la ïoh ïa ka hat-trick.
Ki lai tylli ki kynhun kiba la don ha ki kyrdan ba ha khlieh ki kynthup ïa ka NorthEast United FC, Classic FA bad ka Jamshedpur FC ki la ïoh rung sha ka National Group Stage jong ka Reliance Foundation Development League National Group Stage, katba ka Lajong ha ka don ha ka kyrdan ba shatrai.
