Shillong, Rymphang 28
Ka Mumbai City FC kan ïakhun pyrshah ïa ka Mohun Bagan Super Giant ha ka lympung ïalehkai Indian Super League (ISL) 2024-25 ha ka Sngi Saitjaiñ ha Mumbai Football Arena ha ka por 5 baje janmiet.
Ka Mohun Bagan Super Giant ka dei ka kynhun kaba la rah ïa ka nam lahduh jong ka ISL League hadien ba ka la jop da 1-0 kol pyrshah ïa ka Odisha FC ha la ïing myn ha ka Sngi U Blei. Te kumta ka long ka kynhun kaba nyngkong eh ban rah biang ïa ka nam lahduh ha ka ISL, bad mynta kan pynkhreh ban rah ïa ka ISL Cup.
Kumba ka paw ka Mumbai City FC, ka la jop tang 8 tylli ki jingïakhun ha kane ka samoi, kaba dei ka jingkheiñ kaba duna tam naduh ka aïom ïalehkai 2020-21, bad ka don ha ka kyrdan kaba hynriew da kaba kamai 32 poiñ na ki 21 tylli ki jingïakhun. Te kumta ka donkam sa saw point ban rung sha ka thup kaba hynriew, bad ka lah ban kynjop sha ka thong lada ka lah ban ïalehkai bha.
Ka Mumbai ka la thep kol ha baroh ki 11 tylli ki jingïakhun ba ka la dep pyrshah ïa ka Mohun Bagan Super Giant ha ka ISL. Hynrei ka rukom ïalehkai jong kane ka kynhun ka la hiar hadien ba kam shym la lah ban thep kol ha ki hynñïew tylli ki jingïakhun..
Ha kawei pat ka liang ka Kerala Blasters FC kan ïakhun pyrshah ïa ka Jamshedpur FC ha Jawaharlal Nehru Stadium kaba ha ha ka por 7:30 janmiet.
Ka Kerala Blasters ka dang shem jingeh ban ïoh rung sha ka thup ba saw namar ka dang don ha ka kyrdan khyndai ryngkat 24 point na 21 sien ïakhun, hynrei lada ka lah ban khur jingjop kan dang ïai sah ha kajuh ka kyrdan. Katba ka Jamshedpur ka don ha ka kyrdan ba saw ryngkat 37 point bad lada ka jop kan knieh noh ïa ka kyrdan balai ba la bat da ka Bengaluru (37 point).
