Shillong, Lber 04
Ka jingïalehkai bha u Virat Kohli ban ïoh haduh 84 run ka la pynlong ïa ka India ban pynliem noh ïa ka Australia da 4 wiket ha ka jingïakhun semi final kaba nyngkong jong ka ICC Champions Trophy ha ka Sngi Ba-ar ha Dubai International Stadium..
Kane ka kynhun hapoh ka jingïalam u Rohit Sharma kum kapten, ka la lah ban kynjoh sha ka thong da kaba ïoh 267 run ha ki 48.1 over. U Shreyas Iyer (45) bad u KL Rahul (42 not out) ryngkat bad u Hardik Pandya (28) ki la long napdeng nongïaleh-kai kiba kynsai ha kane ka jingïakhun ka ban rai ïa ka jingïoh rung sha ka final ha ka sien kaba lai ha kane ka lympung.
Kham ha shwa ki nongkawang bol ka India ki la lah ban pynurlong ban pynkhyllem baroh ki nongtied ka Australia na ka bynta buh ïa ka thong tang 264 run hadien ba ka la jied ban kawang bol nyngkong. U Mohammed Shami u la long nongka-wang bol ba kynsai ka India ha kaba u la lah ban shim 3 wiket na ka bynta 48 run, katba u Varun Chakravarthy bad u Ravindra Jadeja ki la shim mar 2 wiket.
Ha kane ka jingïa-khun, u kapten ka Austra-lia u Steve Smith u la lah ban ïalehkai bha ha kaba u la ïoh 73 run na 96 bol (4x4s & 6×1) lem bad u Alex Carey (not out) uba la ïoh 61 run na 57 bol (8x4s & 6×1).
Lyngba kane ka jingjop, ka India kan pynkhreh ïa ka jingïakhun final pyrshah ïa kawei na ki nongjop hapdeng ka South Africa bad ka New Zealand ki ban ïakhun ïa ka semi final ba ar mynta ka Sngi Balang.
