Mexico City, Lber:
Katkum ki khubor, la ong ba haduh 25 ngut kiba shong ha kawei ka bos, ki la duh noh ia la ka jingim hadien jong ar tylli ki jingjia tyngkhuh kali heh ha Mexico ha ka Sngi Nyngkong.
Ha ka bynta ba Shatei jong ka ri, ki don 14 ngut kiba la khlad na ka tyngkhuh hapdeng kawei ka traktor bad kawei ka bos kaba kit ia ki nongleit nongwan na ka nongbah Texas jong ka US. Napdeng kitei 24 ngut kiba shong ha katei ka bus, tang 10 ngut ki la lait im.
Ha ka bynta ba Shathie jong ka Mexico pat, kawei ka bus ka la kylla ha shi lynter jong ka surok bah ha ka nongbah Oaxaca, ha kaba 11 ngut ki briew ki la khlad noh ha katei ka jingjia.
Katba 12 ngut kiwei pat la pynkit noh sha ka hospital ba hajan ha ryngkat ki jingmynsaw bapher bapher ba ki la ngat ha katei ka jingjia, 2 ngut napdeng kitei dei kiba la mynsaw jur bha bad ki bor pyniaid ki dang ialeh ban ai ka jingsumar kaba biang bad kloi-lan na ka bynta jong ki.
Ki bor pyniaid kin sdang ia ka jingtohkit ban lap ia ka daw jong katei ka jingjia, kaba la jia hajan ka shnong Santo Domingo Narro, ong ka khubor.
Ki jingjia aksiden surok kiba pyniap briew ki ju jia ha Mexico namar ka jingpynher stet bha, ka jingsniew jong ka kali ne ka surok bad ka jingtlot jong ki nongñiah kali.
