Kyiv, Lber:
U President ka Ukraine, u Volodymyr Zelensky ha ka Sngi Ba-ar, u la ai jingkyrshan ia ka jingtyrwa jong ka United States ban sangeh iasiat kumba 30 sngi lane shi bnai kynthih, hynrei u la ong ba ka US ka dei ban pynkohnguh ia ka Russia ba kan mynjur halor katei ka jingtyrwa ban sangeh shipor.
Kane ka jingkren jong u, ka long hadien ba ki heh ka US bad ki jong ka Ukraine, ki la ioh ban iakren bniah bha hapoh ka jingialang kaba la pynlong ha Saudi Arabia, ha kaba ka United States ka la mynjur ban iatreilang biang bad ka Ukraine ha ki liang ka pathai jingtip bad ban pynsangeh shipor ruh ia ka thma hapoh Ukraine. Kumta ruh u Zelensky u la pynpaw ba u long ba la kloi ban pdiang ia katei ka jingtyrwa jong ka US ha kane ka sien bad u khmih lynti ruh ba kane ka rai kan sdang treikam noh shen hi, shuwa ba kaei-kaei kaba sniew kan wan jia ia ka Ukraine bad Russia.
