Shillong, Lber 12
Ka Boxing Federation of India (BFI) ha ka Sngi Balang ka la kyntait ïa ka jingtyrwa kyrteng jong u Anurag Thakur ban shah pynrung ha ka jingthep vote na ka bynta ka ilekshon ka ban long ha ka 28 tarik mynta u bnai, da kaba ong ba utei u Myntri barim ka tnad ïalehkai, um don hok ban mihkhmat ïa ka Himachal Pradesh.
Ka Himachal Pradesh Boxing Association (HP-BA) ka la phah ïa ka kyrteng jong u Thakur bad President u Rajesh Bhan-dari. Ka BFI ka la pynmih ïa 60 ngut ki nongmihkhmat na ka bynta katei ka ilekshon hadien ba la dep ban bishar bniah. U Thakur, MP jong ka BJP sha Lok Sabha, la khmih lynti ba un ïakhun ïa ka shuki President ka BFI. “U Anurag Singh Thakur (Himachal Pra-desh Boxing Association). Ka State Unit ka la phah ïa ka kyrteng, hynrei la shem ba um dei hok namar ba u la pynkheiñ ïa ka jingpynbna jong ka Boxing Federation of India ha ka 07.03.2025 bad ka National Sports Development Code of India, 2011,” la ong ka BFI.
Ka jingpynbna ha ka 7 tarik mynta u bnai, kaba la phah sha baroh ki synjuk ïalehkai jong ki jylla bapher bapher, ka la kdew ba “tang ki dkhot kiba shisha bad kiba la jied hok ha ka por jong ka AGM (ba ithuh da ka BFI) jong ki Jylla kiba ïasoh bad ka BFI yn ai bor ban mihkhmat ïa la ki jong ki jong ki Jylla/Union Territory”.
“U Thakur um dei u dkhot ba la jied ha ka ilekshon jong ka synjuk ïalehkai Himachal Pra-desh, dei na kata ka daw ba la kyntait ïa ka kyrteng jong u. Ka dei ka kam jong ka BFI ban bishar bniah ïa baroh ki kyrteng bad ban phah ïa ka thup jong ki kyrtong kiba biang sha u Returning Officer, uba mynta un sa pyllait ïa ka thup,” la ong ka tyllong khubor na ka BFI.
Hynrei ka HPBA ka la pynskhem ba u Thakur u dei dkhot ba la jied da ka Executive Council jong katei ka Jylla. “U Anurag Thakur u dei dkhot ba la jied. U la long dkhot la bun snem ba la dep ha ki kyrdan bapher bapher kynthup kum Chairman. Hynrei mynta u la shah jied kum u dkhot ka EC. Ngi don lut ïa ki kot ki sla,” la ong Secretary ka HPBA u Surender Kumar Shandil.
“Ngi la phah ar tylli ki kyrteng na ka liang jong ngi, ai ba u returning officer un leh ïa la ka jong ka kam,” u la bynrap.
Ka tyllong khubor na ka BFI ka la kyntait ba namar ka dei ka kynhun kmie, ka don ïa ki jingthoh jong ki ilekshon ba la dep ba la pynlong da ka synjuk ïalehkai bad ka kyrteng jong u Thakur kam paw hangtei.
Katkum ka riti pynïaid jong ka BFI “Kawei pa kawei ka synjuk kan don ar ngut ki dkhot nongmihkhmat ba la aibor da u President bad Secretary jong ki synjuk sha katei ka ilekshon.”
Katba ka ilekshon kaba la buh ban long ha ka 28 tarik mynta u bnai, hynrei ïa ka tarik ba khatduh ban thep kyrteng bad ban weng kyrteng, ym pat lah ban pynbna da ka BFI.
“Ngim pat ïoh kano-kano ka por, kaba dei ka buit kaba pynslem bha da ka BFI,” la ong u Shandil.
La khmih lynti ba u President ka BFI, u Ajay Singh, uba dei u Chairman bad Managing Director jong ka Spice Jet, un pan ban shah jied biang, namar ba u la dep pynlut ar samoi ban khlieh ïa katei ka synjuk.
Ka BFI ka la kyntait ruh ïa ka kyrteng jong u Bah Larry Kharpran (Meghalaya) bad u Asish Kumar Saha (Tripura) na katei ka juh ka daw bad ka la pynshai ba ki ar tylli ki kyrteng kiba la phah da ka synjuk ïalehkai jong ka Delhi — u Rohit Jainendra Jain bad u Neeraj Kant Bhatt — ki dei kiba hap ha ka jingpynbna na u Returning Officer.
Na ka liangg ka Indian Olympic Association (IOA) ka la thaw ïa ka Ad-hoc panel kaba don san ngut ki dkhot ban peit ïa ka jingtreikam kaba man ka sngi jong ka synjuk ïalehkai boxing ha ka ri hadien ba ka BFI kam shym la lah ban pynlong ïa ka ilekshon ha ka por kaba biang.
Hynrei ka Delhi High Court ha ka 4 tarik mynta u bnai ka la pynsangeh noh ïa katei ka hukum hadien ba ka synjuk ka la kyrpad da kaba ong ba katei ka jingleh ka long kaba be-aiñ.
Ha ka jingshisha ka BFI ka la dei ban pynlong ïa ka ilekshon jong ka ha lane shwa ka 2 tarik u Rymphang mynta u snem.
