Jop ka NIT Meghalaya bad ka Combine SHG ha ka Inter Office Cum Corporate League T20 Cricket Tournament 2025

Shillong, Lber 14

Ka NIT Meghalaya ka la lah ban pynliem noh ïa ka PHE Sohra Division, katba ka Combine SHG ka la jop ïa ka Sohra Post Office ha ka jingïakhun Inter Office Cum Corporate League T20 Cricket Tournament 2025  ba la pynlong da ka East Khasi Hills Cricket Association (EKHCA), ha Sohra ha ka Sngi Thohdieng.

Ha kane ka jingïakhun ka NIT Meghalaya ka la jop da 4 wiket pyrshah ïa ka PHE Sohra Division ha ka jingïalehkai ba nyngkong, katba ka Combine SHG ka la lah ban pynliem da 74 ron ïa ka Sohra Post Office ha ka jingïa-khun ba ar.

Haba phai sha ka jingïakhun kaba nyngkong la sakhi ïa ka PHE Sohra Division kaba la rai ban tied nyngkong hadien ba la jop kynting pisa bad ïoh tang 66 ron na bynta ban duh 6 wiket na 8 over. U Ricky Surong u la lah ban tied bha da kaba ïoh 18 ron na 15 bol.

Na ka liang ki rangkawang bol jong ka NIT Meghalaya dei tang u Vickyson Lambert War uba la shim 2 wiket, ai 10 ron na 2 over.

Wat la na ka liang u rangkawang bol jong ka PHE Sohra Division u Rahnam Nongspung u la shim 4 wiket, ai 12 ron na 3 over hynrei kane kam shym la khanglad ïa ka NIT Meghalaya ba kan pyndep bad kynjoh ïa ka thong ba ka donkam da kaba hap tang 6 wiket, kata ban ïoh 69 ron na 7.5 over ban jop ïa ka jingïakhun da 4 wiket. U Vickyson Lambert War uba la lamkhmat ha ka liang ban tied u la lah ban ïoh 22 ron na 17 bol bad ban ïohpdiang shisyndon ïa ka nam Player of the Match.

Haba phai sha ka jingïalehkai kaba bud kaba la long hapdeng ka Sohra Post Office pyrshah ïa ka Combine SHG, dei ka Combine SHG kaba la jop kynting pisa bad shimti shwa ban tied nyngkong.

Ha ka jingïakhun ka Combine SHG ka la lah ban ïoh 151 ron bad hap 1 wiket na 12 over. U Banphira Basaiawmoit u la long kum nongtied ba kongsan tam da kaba ïoh 59 ron na 34 bol, katba u Daryll Donald Nongbri rang kawang bol ka Sohra Post Office u la lah ban shim 1 wiket  bad ai 19 ron  na 3 over.

Ka Sohra Post Office haba pyrshang ban beh ïa ka thong ba la buh da ka liang pyrshah ka la ïoh tang 77 ron bad hap 4 wiket ha ki 12 over. Wat la u Michael Roy Shongdiar u la lah ban lehkai bha da kaba ïoh 33 ron na 31 bol hynrei ka kynhun ka dang sah shadien sa 74 ron ban kynjoh ïa ka thong. U Kevin Diengdoh rang kawang bol ka Combine SHG u la lah ban shim 1 wiket  bad ai 10 ron na 3 over.

U Banphira Basaiaw-moit rangïalehkai ka Combine SHG u la ïohpdiang ïa ka nam Player of the Match.