Shillong, Lber 14
U Bah Dipshon Lyngdoh Nongbri uba dei Secretary ka Shillong Sports Association (SSA) u la pyntip ba ka synjuk ka la wer kyrpang ïa ki ‘rang ïalehkai Football ka India ryngkat lang bad u Coach bad ka kynhun baroh kawei ba kin wan ban sakhi ïa ka jingïakhun kaba khatduh jong ka OC Blue Shillong Premier League (SPL) 2024 ka ban long hapdeng ka Mawlai SC pyrshah ïa ka Shillong Lajong FC.
Ha ka jingïakren bad ki lad pathai khubor u Bah Nongbri u la ong ba ka jingwan ban sakhi lang da ki rangïalehkai ka India ïa kane ka jingïakhun ka long hadien ba ki la wan poi ha nongbah Shillong kum shi bynta ka jingpynkhreh ba kin ïakhun ïa ar tylli ki jingïalehkai bar ri ka ban dei shwa da ka jingïalehkai paralok hapdeng ka India pyrshah ïa ka Maldives bad bud pat sa ka jingïakhun pyrshah ïa ka Bangladesh na ka bynta ka AFC Asian Cup 2027 qualifiers. “Ngi la phah ïa ka jingkhot sngewbha sha ka kynhun ïalehkai jong ka India ba kynthup ïa u coach ki player bad ki managers,” u la ong.
Nangta u la batai ruh shaphang ka jinglong-jingman jong ka lympung ïalehkai SPL bad ki jingeh kiba kum ka SSA ka shem bad ïakynduh ha ka por ba ki pynlong ïa kane ka lympung ha kine hynriew bnai ba la dep.
Shuh shuh u la ong ïa ka Shillong Sports Association la seng naduh u snem 1916 da ka jingthmu ban kyntiew ïa ka kam ïalehkai football bad ban pynpawnam ïa kane ka jingïalehkai hapoh ka jylla. “Ngi sngewtynnad ba ngi la lah ban pyndep ïa ka SPL kaba 2024 haduh 89 tylli ki jingïakhun bad lashai ka sngi kan dei ka jingïalehkai kaba 90, ka ban dei ruh ka sngi kaba ki kynhun kin ïa knieh ïa ka nam lahduh,” u la ong.
U la ong ruh kumba long mynta ka SSA ka pynïaid ïa ka Under-20 4th Division, ka 3rd Division, ka 2th Division, 1st Division. “Ngi don 10 tylli ki kynhun bad kine baroh 10 tylli ki kynhun ki la ïalehkai bha bad baroh ki rangïalehkai kiba kynsai na ka jylla ki la don ha kine 10 tylli ki kynhun” u la ong . “Katkum ka jingpynïaid jong ka SSA ïa kane ka League ka long ba kin don ar tylli ki kynhun ki ban long ka lahduh bad ka ban wan ba-ar, bad kin don ruh ar tylli ki kynhun kiba duna poiñ kin shah pynhiar kyrdan sha ki Division kiba kham shatrai na ka bynta ka samoi ïalehkai kaba 2025,” u la ong.
“Ka Ryntih FC bad ka Nongthymmai SC kin dei ar tylli ki kynhun ki ban shah pynhiar kyrdan ha kane ka samoi ka ban wan 2025, ha kaba ka Ryntih FC ka la ïoh tang 6 poiñ bad ka Nongthymmai ka la ïoh 16 poiñ,” u la pyntip.
Nalor kane, u la pyntip ruh ba haduh kane ka kynti ba mynta jong ka SPL 2024 u Deibormiame Tongper u la long ku, nongthep kol ba bun tam da 19 tylli ki kol bad bud pat sa u Owanijuh Pajuh uba la ïoh ban thep 12 kol.
“Ngi khmih lynti ba kine baroh ar tylli ki kynhun kin ïalehkai bha khnang ba ki paidbah kin hun haba ki wan ban sakhi ïa kane ka jingïalehkai,” u la pynkut.
