Islamabad, Lber:
Katkum ki khubor, la ong ba ki lehnoh Baloch ki la pyllait ia kawei ka durkhih kaba la pyni ia ka jingleit thombor jong ki pyrshah ia ka kynhun ki bor pahara ka Pakistan, ha kaba 5 ngut ki la khlad ha ka Sngi U Blei, kynthup ia 3 ngut kiba dei ki bor pahara jong ka tnat shipai Pakistan.
Katei ka kam thombor ka long ha ka surok-bah jong ka Noshki hapoh ka nongbah Balochistan bad ia katei ka durkhih la pynsaphriang da ka tnat shipai Balochistan Liberation Army (BLA), ha kaba la iohi ia ka tdem rben kaba iong kaba mih na katei ka bos ki bor pahara ha katei ka jingshah thombor ha katei ka sngi.
Ki pulit ki iathuh ba ki dang ialeh katba lah ban wad bniah ia ki sabut na katei ka jaka ba shah thombor bad katkum ka jingpeit thuh jongki, la i-kumba don u riewkheiñ-duh uba leit ban tur sha katei ka bos jong ki bor pahara bad uba la pyndait bom lypa ha ka thuk- thuk kumba la ju leh da ki lehnoh man ka por.
Hadien jong katei ka jingbthei, la ong ba ki don katto-katne ki lehnoh kiba ther kuli sha ki bor pahara kiba don ha katei ka jaka, ha kaba ki bor pahara ruh ki la ioh ban ïakhun pyrshah hynrei 3 ngut ki bor pahara ki la kyllon iap noh hapdeng katei ka jingiakhun. Kumjuh ruh 2 ngut kiwei pat ki riew paidbah kiba don ha katei hi ka jaka, ki la ngat bad khlad lang noh hapdeng ka jingiather kuli hapdeng ki lehnoh bad ki bor pahara ha katei ka sngi. Hadien ka jingiather kuli markylliang, ki bor pahara ki la ioh ban pynkhyllem ia 2 ngut ki lehnoh ha katei ka jingiakhun.
