New Delhi, Lber:
Ki pulit ka Delhi, ki la kem ïa ki hynñiew ngut ki nong Bangladesh kiba wan rung be-aiñ, kynthup ïa uwei khynnah rit uba dei na shaphang Mihngi jong ka Delhi bad ki la sdang ïa ka jingpynphai biang ïa ki, ong u heh sorkar ha ka Lah Sngi U Blei.
Ki briew kiba la shah kem, ki dei kiba la wan rung be-aiñ sha India lyngba ki wah.
“Ki la sah ha ki jaka bapher bapher ha Delhi bad Ghaziabad. La sdang ïa ka jingpynkynriah noh ïa ki da ka jingïarap jong ka ophis pynrung kyrteng ïa ki bar jylla (FRRO),” ong u Deputy Commissioner of Police (East) u Abhishek Dhania.
Ha ka 16 tarik u Lber, da kaba leh katkum ka jingïoh jingtip, ki pulit ki la kem ïa uwei u briew uba la tip kyrteng kum u Dilawar Khan na ka thaiñ Krishna Nagar. Ha ka jingtohkit kaba nyngkong, u la kam ba u dei u nongshong shnong jong ka West Bengal hynrei haba la bteng ïa ka jingtohkit bad ka jingpynshisha la pynpaw ba u dei u nong Bangladesh na ka Khulna distrik ha Bangladesh.
Kumta, ki pulit ki la lap sa 6 ngut ki nong Bangladesh kiba sah be-aiñ ha ki bynta bapher bapher jong ka Delhi-NCR. La pynlong ïa ki jingkhynra ha ki jaka ha Laxmi Nagar, Lajpat Nagar, Krishna Nagar, Seemapuri bad Shalimar Garden ha Ghaziabad, kaba la pynlong ïa ki ban shah set phatok, u la ong bad bynrap ba ka jingtohkit kaba kham bniah ka dang ïaid shakhmat.
Ïa kane ka jingpyntreikam ban ïakhun pyrshah ïa ki nongwan buhai shnong beaiñ kaba dang ïaid shakhmat la sdang ha u bnai Nohprah jong u snem ba la lah. Ki pulit ki la pynjur ïa ka jingpyrshang hadien ka jingïakynduh bad u Myntri ka tnat ki kam pohïing jong ka sorkar pdeng u Amit Shah, u Myntri Rangbah ka jylla bad kiwei kiwei ki nongïalam ha u bnai Rymphang.
