Jowai, Lber 18
Ka shlem treikam u District Sports Officer (DSO), West Jaiñtia Hills ha ka 15 tarik mynta u bnai ka la pynlong ïa ka ASMITA Athletic City League bad ASMITA Badminton City League ha madan Kiang Nangbah Stadium bad Kiang Nangbah Indoor Stadium.
Ka ASMITA (Achieving Sports Milestone by Inspiring Women Through Action) ka hap hapoh ka Khelo India Scheme, ka thmu ban thaw ïa ki lad bad kyntiew ïa ki jingïalehkai hapdeng ki kynthei la ka long ha ka siatkhnam, Athletes, ka jingïalehkai ïakura lane ka jingpyni ïa ka jingtbit ha ka Badminton, Basketball, phutbol, bad Tennis.
Ha ka jingïakop mareh Under-20, la sakhi ïa ka jingïashim bynta shitrhem jong ki kynthei ha ki kyrdan bapher-bapher, naduh ka kyrdan 100m, 200m, 800m, 1500m, kumjuh ka Shot-Put bad Long Jump.
Ha ka Badminton Under-19 ki jingïalehkai ki kynthup naduh ka Single, Open Category bad Double Category.
Ki nongjop ha ka 100m ki long ka Wankynsai Pyrtuh, ba-ar Eligency Susngi bad balai ka Navarre Laloo. Ha ka 200m, ka Hakini Shullet ka la wan ba nyngkong bad bud sa ka Felicyjune Suiam bad ka Eligency Susngi kiba la wan ba-ar bad balai.
Ha ka 800m, ka Deisaphi Shadap ka la wan ha ka kyrdan kaba nyngkong, ba-ar ka Larihun Suiam bad balai ka Stacyroy Sutnga. Ha ka 1500m la wan ba nyngkong da ka Deisaphi Shadap, ba-ar ka Larihun Suiam bad balai ka Dalawanhi Suchiang.
Ha ka Shot-Put la jop da ka Ewanmisa Suting, ba-ar ka Wankynsai Pyrtuh bad balai ka Rikduplang Talang. Ha ka Long Jump la jop da ka Graceful Panoh, ba-ar ka Daphishisha Dkhar bad balai ka Riyoka Talang.
Ha ka jingïalehkai Badminton Singles, la jop da ka Nihaka Lamare hadien ba ka la lah ban pynliem noh ïa ka Dabiangsakani Lyngdoh. Ha ka Girls Under-19 Double’s, ka Aureliana Estefany Passah bad Dabiangsakani Lyngdoh ki la pynliem noh ïa ka Nihaka Lamare bad Dana Angelika Phyllei. Ha ka Open Category Singles, ka Josefina Dala Passah ka la jop pyrshah ïa ka Pretty M Sumer. Ha ka Girls Open Double’s, ka Josefina Dala Passah bad Pretty M Sumer ki la jop ïa ka Nihaka Lamare bad ka Dana Angelika Phyllei.
Ïa ki khusnam sha ki nongjop la sam da u Working President ka WJDSA u Bah EMH Passah bad u Vice President WJDSA Bah Patrick Lamare ha ka jingdonlang u DSO u Bah Khroobok Passah nalor kiwei kiwei ki dkhot nongkitkam ka WJDSA.
