Shillong, Lber 18
Ka Young Guns Cricket Club ka la long ka lahduh ha ka First Division Shillong Cricket League 2024-25 ba la pynïaid da ka Shillong Cricket Association hadien ba ka la lah ban pynliem noh ïa ka Nongthymmai SCC da 13 run ha ka Lah Sngi U Blei.
Ha kane ka jingïakhun final, ka Nongthymmai kaba la jop kynting pisa ka la ailad shwa ïa ka Young Guns ba kan tied nyngkong ha kaba ka la ïoh 159 run bad shah pynhap 10 wiket ha ki 37.4 over. U Raja Khongwir u la tied 35 run na ki 51 bol bad u Rudra Singh u la ïoh 26 run na ki 49 bol. Katba u Gaurav Nerlang u la shim 3 wiket bad 1 wiket da u Ram Nijjar na ka bynta ka Nongthymmai.
Ka Nongthymmai haba wan beh ïa ka thong ka la ïoh tang 146 run bad shah pynhap 10 wiket ha ki 38.2 over. U Banialam Mylliemngap u la tied 44 run na ki 65 bol bad u Ashish Lohar u la ïoh 28 run na ki 40 bol. Katba u Mewankitbok Kharpuri bad u Angkit Tamang ki la shim mar 2 wiket na ka bynta ka Young Guns. Ïa ka nam ‘Player of the Match’ la ïohpdiang da u Angkit Tamang uba la tied 15 run bad shim 2 wiket.
Te kumta ka Young Guns bad ka Nongthym-mai ki la jam sha ka Super Division bad kin ïoh ban shim bynta naduh ka aïom kaba thymmai.
