New Delhi, Lber:
Ka sorkar pdeng ka la pyntip sha ka Lok Sabha ba hadien ba la dep ban khmih bniah ïa ki jingkheiñ ba la ïohlum halorka jingdon jong ki lanot kiba la shah ktah na ki jingshlei um, ki bor sorkar ki la pyntikna ban pynïoh ki lad jingïarap na ka bynta jong ki.
Kumba la sakhi, la ong ba ki la don kumba 2,936 ngut ki briew kiba la duh ei ïa la ka jong ka jingim na ka daw jong ka jingshah thombor ha ki bor ka mariang ha ka ri ha u snem ba la lah, ha kaba ka Himachal Pradesh ka dei ka jylla kaba bun eh ka jingjulor.
Na kine, ki don 408 ngut kiba ïap ha Himachal Pradesh, 373 ngut ha Madhya Pradesh, 355 ngut ha Kerala, 230 ngut ha Gujarat bad 206 ngut ha Maharashtra, la ong u Myntri khynnah jong ka tnat ki kam pohïing, u Nityanand Rai. “Lait na ki san tylli ki jylla kiba kham paw, 185 ngut ki briew ki la duh noh ïa la ka jong ka jingim ha Karnataka, 131 ngut ha Rajasthan, 128 ngut ha Assam, bad 125 ngut ha Chhattisgarh,” u la bynrap.
Namar ba ka tnad ki kam pohïing jong ka sorkar pdeng kam pynpaw paidbah ïa ki jingtip jong ki jingjulor namar kino kino ki jingjia ba sngewsih, kynthup ïa ka jingshlei um bad ka jingtwa khyndew, u la ai ïa ki jingtip, katkum ki jingtip ba la ïoh na ki sorkar jylla/UT bapher bapher ha kaba ïadei bad ki jingtip ba bniah jong ki jingjulor namar ki jingjia ba sngewsih kaba la mih na ki jingshlei um.
Haba kyllum lang, u Rai u la ong ba ki don 3,63,381 tylli ki ïing/ïingtrep kiba la shah pynjulor, bad 61,826 tylli ki jingri ki la duh noh na ka jingshah thombor ha ka mariang. “Na ki 3,63,381 tylli ki ïing/ïingtrep kiba la shah pynjulor ha Assam ki long 1,56,691 tylli, ha Tripura 67,487 ki la shah pynjulor (78 ngut ki briew ki la duh ïa ka jingim), 29,369 tylli ki ïing/ïingtrep ki la shah pynjulor ha Manipur (11 ngut ki briew ki la duh ei ïa ka jingim), 22,414 tylli ki ïing/ïingtrep ki la julor ha Kartakana bad 20,741 tylli ki ïing/ïingtreo ki la shah pynjulor ha Gujarat,” u la bynrap.
U la ong ba katkum ka National Policy on Disaster Management, ka jingkitkhlieh kaba hakhmat eh na ka bynta kiba ïakynduh jingeh na ki jingthombor jong ki bor ka mariang, kynthup ïa ka jingsam ïa ki jingïarap, kiwei pat ki jingïarap ka shong ha ki sorkar jylla kiba ïadei kam. “Ki sorkar jylla ki shim ïa ki lad jingïarap hadien ba mih ki jingjia basngewsih na ka pisa ba la buh lypa ha ka jingpynïaid jong ki, katkum ki tiar bad ki kyndon ba la mynjur da ka sorkar pdeng. Ka sorkar pdeng ka pynbiang ïa ki jingpyntreikam jong ki sorkar jylla bad ka ai ïa ki jingdonkam bad jingkyrshan pisa,” u la bynrap.
Ha kaba ïadei bad ka jingïarap pisa ba la pyndap na ka National Disaster Response Fund (NDRF) ha ki por ba jia ki jingjia ba shyrkhei hadien ka jingbishar bniah kaba la pynshong nongrim ha ka jingleit jngoh jong ka Inter-Ministerial Central Team (IMCT), u Rai u la ong: “Haduh ka 27 tarik, Kyllalyngkot, baroh 14 tylli ki IMCT ba la kynthup na ka bynta ki jylla bad ki UT jong ka Assam, Andhra Pradesh, Mizoram, Kerala, Nagaland, Tripura, Gujarat, Telangana, West Bengal, Bihar, Himachal Pradesh, Odisha, Tamil Nadu, and Puducherry na ka bynta ban bishar bniah ha ka jaka ïa ki jingjulor kiba mih na ka jingthombor ka mariang ha u snem 2024.
