Shillong, Lber 19
Ka kynhun ïalehkai phutbol ka ri India ka la pynliem noh ïa ka Maldives da 3-0 kol ha ka jingïa-lehkai paralok (FIFA International Friendly) ha ka Sngi Balang ha Jawaharlal Nehru, Shillong.
Kane ka nam jop ka la wan urlong lyngba ki kol ba la thep da u Rahul Bheke, Liston Colaco lem bad u khlur ïalehkai uba la wanphai na kaba shongthait u Sunil Chhetri.
Kane ka jingïalehkai paralok ka long shi bynta ïa kine baroh ar kynhun ba kin pynkhreh ïa ki jingïalehkai jong ka AFC Asian Cup 2027 Qualifier.
Kane ka dei ka jingïakhun kaba 19 sien hapdeng kine arliang mamla, ha kaba ka India mynta ka la jop 13 sien bad ka Maldives pat ka la jop lai sien bad ïakhaid lai sien. Ka sien khatduh ba kine arliang mamla ki la ïakynduh ka dei ha u snem 2021, ha kaba ka India ka la jop da 3-1 kol ha ka SAFF Championship.
Kumba ka paw kane ka long ka sien kaba nyngkong eh ba ka India kan wan ban ïalehkai ha kane ka nongbah bad ban pynpaw ïa ka jingkhlaiñ bor pyrshah ïa ka Maldives hakhmat hajar ngut ki nongpeitkai kiba la pyndap smam ïa ka stadium.
Wat hapdeng ka jingïakhun kaba itynnad, ka India ka la lah ban pynpaw ïa ka jingtbit ha kaba ka la ïoh ïa ki kabu kiba biang hynrei kam shym la lah ban thep. Hadien shiteng kynta kane ka kynhun hapoh ka jingïalam u Manolo Marquez ka la pynkhih jar nyngkong lyngba u Rahul Bheke (35), uba la lah ban pyndei ïa ka bol da ka khlieh na kyndong (corner) ba la shut da u Brandon Fernandes.
Kane ka shi kol ka la nang pynïoh mynsiem shuh shuh ïa ka India ha kaba ka la ïoh bun tylli ki kabu ksiar. Hapdeng kane ka jingïakhun, ka India ka la bteng biang ban thep ïa ka kol ba ar ha ka minit kaba 66 jong ka kylla miet lyngba u Liston Colaco, uba la pyndei ïa ka bol da ka khlieh na kyndong ba la shut da u Mahesh Singh.
Ka India ka la thep biang ïa ka kol kaba lai lyngba u khlur ïalehkai uba la wanphai na kaba shngthait, u Sunil Chhetri hadien ka jingïarap pynbuh bol da u Liston ha ka minit kaba 76. Haduh kane ka jingïakhun kaba 152 sien ka jong u na ka bynta ka India ha ki jingïalehkai bar ri, u Chhetri u la kynjoh sha 95 kol bad la khmih lynti ba un sa lah ban kynjoh sha 100 kol lada u dang lah ban thep kol biang ha ki jingïakhun ban wan. Haduh kaba kut ka Maldives kam shym la lah ban pynphai bad ka la mad ïa ka jingshah rem.
Lyngba kane ka jingjop ka India kan pynkhreh ïa ka jingïakhun pyrshah ïa ka Bangladesh ha ka wat kaba nyngkong jong ka AFC Asian Cup 2027 Qualifier ka ban long ha kane ka nongbah ha ka 25 tarik mynta u bnai, katba ka Maldives kan leit ïakhun sha Philippi.
