New Delhi, Lber:
Haba ïashim bynta ha ka jingïatai halor ki jingdawa ïa ki Grant kiba hap hapoh ka jingsynshar jong ka tnad Rel na ka bynta u snem 2025-26, u MP ka BJP u Janardhan Singh Sigriwal u la ong ba u sngew lyng-ngoh haduh katno tylli ki kam u dei ban kren namar ba ka la don ka jingpynroi baroh ki liang jong ka Railways ha Bihar.
“Ka Bihar kan wanphai biang ha u snem 2025 (Ka Bihar ka dang roi bad ka sorkar NDA kan sa wanphai biang hapoh ka jingïalam jong u Nitish Kumar ha u snem 2025),” la ong u Sigriwal.
Ka jingthep vote sha ka ïingdorbar thawaiñ ha kane ka jylla kan long ha kaba kut jong une u snem bad ka sorkar National Democratic Alliance (NDA) ba la ïalam da u Nitish Kumar jong ka JD(U) ka dang wad ban khanglad ïa ka jingpyrshah na ka Mahagathbandhan ba la ïalam da ka RJD bad ban wanphai biang sha ka bor synshar.
U Sigriwal, u MP na Bihar’s Maharajganj, u la ong ba la buh bun ki kyndon ha ka mang tyngka jong ka sorkar pdeng 2025-26 ban kyntiew ïa ka jingpynïasoh bad ka jingshngaiñ ha ki lynti rel.
Ka kam ban pynlong ïa ki jaka bad ki steshon kiba kham bha ban ïa ki kad liengsuiñ la leh da ka tnad rel, u la ong. Ka Rel ka la leh ïa ka kam ban pynïasoh ïa ka thaiñ ba shaphang Shatei bad Shathie jong ka Bihar, u la bynrap.
U Sigriwal u la ong ba 1,832 kilomitar ka lynti rel thymmai, kaba ïaryngkat bad ka lynti rel baroh kawei jong ka ri kum ka Malaysia, la buh ha kane ka jylla naduh u snem 2014.
“Ngi shimkhia na ka bynta ka jingbha jong ki briew bad ngim trei na ka bynta kaba paw shabar kum kiwei pat. U Narendra Modi u don ka bor ban pyndep ïa ki kam jong ki briew bad ban pynthikna ïa ki jingdonkam na ka bynta jong ki,” la pynskhem u MP ka BJP.
