U Nongsaiñ Hima, 1969
Naduh ba u nongrep u mait u prad bad pynkhreh ïa ka khyndew ban bet ïa u symbai bad haduh ban da leit die ïa u sha ki ïew, ka jingim u nongrep ka long ka jingïaleh ym tang bad ka mariang hynrei bad ki mahajon hynrei bad ki mahajon ruh. Bad ka mariang u la dei ban peit thuh bha ba lano un hap u slap bad ïano la dei ban bet ia u symbai. Lada la wan dier u slap kata ruh ym long bad lada wan kloi ruh um long. U slap un wan biang por bad ñiar eh ba u slap un wan biang por. Na kane ka daw lah ban ong ba ka jingrep ha kane ka ri jong ngi ka long ka khalai nusip.
Ka ri jong ngi ka dei ka ri ki nongrep. Bun bah bad lah ban ong ba 90 na ka shi spah ki im ja na ka rep. Haba ka long kumta la ju don mo kiba kit khia lem ïa u nongrep ha kane ka kam kaba khraw. La ong uwei u ‘riew pyrkhat ba uwei u nongrep uba lah ban pynmih tang shi rynjop u kba u ïa ryngkat bad 10ngut ki ‘politician.’ Sngap keiñ ka jingkhraw jong u nongrep, dei ma uba sei na ka mei ramew ïa ka spah, ym dei kito ki babu kiba shong ha ki shuki ha ophis. Kine kim pynmih ei ei hynrei dei u nongrep uba pynmih ban sei ïa ka spah na ka mariang. ïa kum kane ka jingpynmih ha ka ‘Economics’ (ka jingstad kaba ïadei ba ka ioh ka kot) la khot ka ‘economic wealth.’ Kane ka ‘economic wealth’ ka dei ka spah ba shisha bad kaba long ka nongrim jong kano ka jaidbynriew ha ka pyrthei.
Ka sorkar ne na ka liang ki District Council kim shym la leh eiei ban ïalam ia u nongrep ha ka rukom kaba dei. Ha ka jingrep, donkam ka um bad ïa kane ha ki jaka la dei ban tan bad ring na sha jngai. Hato ia kane la iarap ne la ai jingïarap da ki Bynta Trei ia ka Rep ka Riang jong ka sorkar ne la shu ïehnoh ha kti kine ki nongrep kiba long kiba duk ? Nangta pat la poi sa ka por ot ïa u symbai bad la dei ruh ka por ba la dei ban die ïa u. Katno ka jingeh ki shem namar dei ma ki ki ban hap leit kylli dor ban die. Katno ngut na kine ki nongrep ki ban lah ban set ïa une u symbai uba ki la ot namar ba ka dor ka tad than bad ban ap tad haduh ban da kiew dor ? Niar kiba lah ban kyrshan kumne. Kumta kine ki nongrep ha kane ka lynti ka jingim jong ka jingïaleh jong ki, ki la dei ban shu shah khniot ha ki nongthied, ïa ka dor.
Kam la dei ka por ba ki District Council na ka sorkar kin leh eiei shaphang kane kaba pynïaid ïew ïa kine ki jingthung kiba la pynmih ki nongrep na ka bynta ka jingroi jingpa jong ki bad jong ka ri ?
Na ka liang ki nongrep ki la dei ban ïa synjuk lang kawei ka buit ka bor bad ïaleh ïa kine ki jingeh. Shim kum ïa u phan ki la dei ban don ka synjuk ki nongthung phan. Kane ka synjuk kan iarap ïa ki ban pynioh ia u symbai uba bha bad ïa ka jingthung phan dei ban da husiar bha.
Namar ba ka ju long ha ka ri jong ngi tang shu kiew dor u phan ha kawei ka snem, ha ka snem kaba bud phin lap ba baroh ki la thung phan.Mih bun ki phan ban ïa kaba donkam bad kumta hiar dor u phan. Kane ka synjuk ka la dei ban ym shah ban thung palat ban ïa ka ba donkam ban khang lad ïa ka jinghir dor u phan. Kane ka synjuk ruh ka dei ban wad lad ïa ka iew phan shabar ka ri bad lada donkam dei ban kyntu ia ka sorkar ba ka dei ban shimti hi ma ka ïa une u symbai ban die sha ki ïew kiba shabar shnong.
