Shillong, Lber 23
Ka Delhi FC ka la shah pynhiar kyrdan noh na ka I-League hadien ba ka la mad biang ïa ka jingshah rem sa ha ka Real Kashmir da 2-1 kol ha ka sngi Saitjaiñ ha Mahilpur Football Stadium.
Ha katei ka jingïakhun ka Real Kashmir ka la thep ar kol ha ka kylla step lyngba u Mohammad Inam (4′) bad u Gnohere Krizo (26′), hynrei ka Delhi ka la lah ban pynphai kylla shi kol lyngba u Hridaya Jain (55′).
Lyngba ka jingjop, ka Real Kashmir ka la jam sha ka kyrdan balai ryngkat 35 point na ki 20 sien ïakhun bad ka dang sah sa arsien ïakhun ha kane ka lympung. Katba ka Delhi kaba la kiew kyrdan sha kane ka lympung ha u 2022, ka la ïai sah ha ka kyrdan shatrai duh ryngkat 13 point na ki 20 sien ïakhun. Kane ka kynhun ka la jop 3 sien, ïakhaid 4 sien bad shah rem 13 sien.
Ha kawei pat ka liang ka Shillong Lajong kan pynkhreh ban ïakhun pyrshah ïa ka Inter Kashi mynta ka Lah Sngi U Blei ha Kalyani Stadium kaba ha West Bengal ha ka por 7 baje janmiet. Kine ki kynhun kim shym la lah ban thep kol ha ka wat kaba nyngkong ba la long ha ka nongbah Shillong ha ka 5 tarik u Nohprah mynshem snem.
