Gaza City, Lber:
Ka Hamas ha ka Sngi Palei ka la khot ia baroh ki ri Arab bad ki ri Muslim ban leh eiei noh kloi ban pynsangeh noh ia ka jingleit hiar thma jong ka Israel ha kane ka sien, ha kaba ka Hamas ka la kular ba ka kloi ban pynurlong ia kano-kano ruh ka jingtyrwa tang ba ka Israel kan pynkut noh ia ka jingleit thombor sha nongbah Gaza.
Namar la ong ba ka Israel ka la sdang ban leit thombor bad leit hiar thma biang sha nongbah Gaza ha ka Sngi Ba-ar jong kane ka taïew, da kaba ther dusmon haduh bun tylli ki ‘namding bad ki bom ba shyrkhei. Kane ka jingleit thombor biang jong ka Israel ka la pyn-dkut noh ia ka shongsuk- shongsaiñ ba shipor kaba la sakhi ha ki por ba ka Hamas bad ka Israel ki mynjur ban sangeh iasiat shipor na ka bynta ban ioh ailad ia ka jingpyllait briew markylliang.
Kumta, ha ka Sngi Palei, la ong ba ki shipai ka Israel ki la leit ban hiar thma biang ia ka nongbah Gaza kumba ju long ha ki bnai ba la leit khamtam hapoh ka nongbah Rafah.
Ka tnat ïada jong ka Gaza, ka la pyntip ba 504 ngut ki la dep iap ei na katei ka jingleit thombor ba thymmai jong ka Israel ha kane ka sien, kynthup ia 190 ngut kiba dang hapoh 18 snem ka rta.
Kane ka jingiap ki riew paidbah ha kane ka sien, ka la long kaba jur tam ban ianujor bad ka jingiap briew ha ka jing-leit hiar thma ka Israel sha Gaza ha kine ki 17 bnai ba la leit.
Kumta, ha katei ka jingpynbna ba la pynmih ha katei ka sngi, ka Hamas ka la pyntip ba ka kloi ban pdiang ia kino- kino ki jingiateh lane ki jingtyrwa na ka liang ka US bad Israel, lada ka long kaba wanrah jingmyntoi bad ka ban ym don jingktah ia ki paidbah nongshong shnong ka nongbah Gaza.
Namarkata, ka Hamas ka la pan jingïarap bad khot ia baroh ki ri Arab bad ki ri Muslim ha kylleng ka pyrthei ba kin mih shakhmat ha kane ka sien ban ialeh pyrshah bad ban tehlakam shi syndon ia ka jingleit thombor jong ka Israel.
Hynrei, la ong ba kane ka jingleit hiar thma jong ka Israel, ka long hadien ba ki jingiakren hapdeng ka Israel, ka US bad ka Hamas, ka khlem urlong ne sei-soh kumba la thmu.
Namar ka jingiateh ban sangeh iasiat bad ban pyllait briew markylliang hapdeng ka Israel bad ka Hamas ka la kut noh ha ki khyndiat taïew ba la dep.
Katba, ka Israel ka la kyntait ban iakren ne ban sangeh iasiat biang sa shisien na ka bynta ban sangeh iasiat bad ban ia pyllait briew biang markylliang.
