Shillong, Lber 24
U coach ka kynhun ïalehkai ka India u Manolo Marquez u la pynpaw ba u Hamza Choudhury u long u rangïalehkai ba kynsai namar mynshwa u la ïalehkai teng ha ka Premier League na ka Leicester City bad mynta u la ïalehkai ha ka Championship na ka Sheffield United.
Une u rangïalehkai shapdeng, un mihkhmat ïa ka ri Bangladesh ha ka sien kaba nyngkong eh ban ïakhun pyrshah ïa ka India ha ka AFC Asian Cup 2027 qualifier ka ban long ha ka Sngi Ba-ar ha Jawaharlal Nehru Stadium, Polo.
“Ka long kaba biang eh ban wanrah ïa kum kitei ki rangïalehkai sha ka lympung ïalehkai jong ka dewbah Asia khnang ban kyntiew ïa ka jingïalehkai ym tang ïa ka Bangladesh. Ka long kaba kongsan ba ki paralok ba ïalehkai lang kin ïoh ban ïalehkai lang bad utei u rangïalehkai uba kynsai,” la pynpaw u Marquez ha ka jingïalang bad ki lad pathai khubor ha ka Lah Sngi U Blei.
