Aizawl, Lber:
U Myntri Rangbah ka jylla Mizoram, u Lalduhoma, u la plie paidbah ïa ka ‘Mizoram Universal Healthcare Scheme (MUHS)’, ka ban treikam naduh u Ïaïong mynta u snem.
Kane ka skhim ka thmu ban bujli ïa ki skhim sumar pang kiba la don lypa ban pynthikna ba ki hospital ba la buh ha ka thup ba la shahjied ba kin ym ïakynduh jingeh shuh bad ban ai ka jingïada bad jingïada kaba pura.U Myntri Rangbah u la ban jur ba ka rukom sumar pang kaba khlaiñ ka long kaba kongsan na ka bynta ka jingbha jingmiat jong baroh.
“Ïa kane ka skhim la wanrah hadien ka jingbishar bniah ïa ka jylla ha kine ki san snem ba la dep. Wat hapdeng ki jingeh ha ka liang ka pisa tyngka, ka sorkar ka la buh hakhmat eh ïa kane ka skhim, bad ki bank ki la pynthikna ïa ka jingïatreilang kaba pura jong ki, kaba pynlong ïa kane ka skhim ban treikam,” ong u Lalduhoma. U la ong ba ïa kane ka skhim yn sa pyntreikam da kaba Online bad ha ka rukom bym donkam da ki kot ki sla, la pyntikna shuh shuh.
Kan treikam ruh ha ka rukom khlem pisa, kaba pynduh noh ïa ka jingdonkam jong ki briew shimet ban siew na ka pla jong ki, u la bynrap.U Myntri Rangbah ka jylla u la ong shuh shuh ba, ha kaba sdang, ïa kane ka skhim la thmu da ka jingbei tyngka na ka ram na ka Asian Development Bank (ADB), bad ka jingtreikam ka dang ïaid shakhmat.
“Hynrei wat lada ka ram jong ka ADB kam urlong, ka sorkar jylla ka ngeit skhem ban pyntreikam hok ïa kane ka skhim. Namar ba la buh ban sdang ïa kane ka skhim ha u bnai Ïaïong, ka sorkar ka thmu ban mang T.14.50 klur mynta u bnai ban siew ïa ki bill sumar pang kiba dang sahteng,” u la ong.
Kane ka skhim ka kynthup ïa baroh ki nongtrei sorkar, kiba ïoh penshon, ki riew paidbah, bad ïa baroh kiba don ia ki Golden Card hapoh ka Ayushman Bharat Pradhan Mantri Jan Arogya Yojana (AB PM-JAY).
