New York, Lber:
Kawei ka longïing na South Korea kaba don 3 ngut ki dkhot kiba kynthup ïa ka Jiyeon Lee (33 snem ka rta), ka kmie jong ka- Taehee Kim (59 snem ka rta) bad ka ñia jong ka- Junghee Kim (54 snem ka rta), ki la jah rngai khlem iohi syrngiew shuh katba ki dang leit sha Grand Canyon bad la iathuh ba la lah ban iohi khatduh ia ki dei ha ka por ba ki dang mih na Grand Canyon ban leit sha Las Vegas, ha kaba sdang jong une u bnai.
Katkum ka jingpynbna na ka ophis jong ka Coconino County, ka GPS data na ka kali BMW lieh ba ki la ai wai sha katei ka longïing, ka pyni ba ki la don khatduh eh ha ka surok Interstate 40 ha Williams, Arizona, kumba 35 minit sha ka phang Sepngi na Flagstaff. Ia katei ka jingjah jong katei ka longïing la pyntip sha ki bor ba dei khmih jong katei ka thaiñ bad ki bor pyniaid ki dang ialeh ban bud-dien ia ka jingleit- jingwan jongki khnang ba yn lah ban lap biang ia ki baroh.
Ka Coconino County ka la pynmih ïa ka jingpynbna ba jah na ka bynta kane ka longïing na South Korea bad ka la pynmih ruh ia ka dur ha ka sla ‘Facebook’ ha ka 21 tarik u Lber khnang ba kino-kino kiba iohi ne shem ia ki, kin pyntip sha ki bor pyniaid bad ba yn ioh ban ai jingtip pat sha ki bahaiing-bahasem jong ki ha ka por kaba biang.
