Shillong, Lber 25
Ka AMJ The Boys na Amjalong ka la long sa kawei pat ka kynhun kaba la jam sha ka final ha ka 24th Kiang Ryngksai Football Tournament ba la pynïaid da ka Dawki Amateur Club. Kane ka la long hadien ba ka la lah ban pynliem noh ïa ka Sohkha Shnong Everlasting SC da 1-0 kol ha ka 24 tarik mynta u bnai ha madan Shing Lamin, Dawki.
Kane ka jinglah ban pynthikna ka la wan urlong lyngba ka shi kol ba la thep da u Damon Pathaw ha ka extra time jong ka minit 90+5.
Kawei pat ka kynhun kaba la rung final ha ka sngi Saitjaiñ ka dei ka Nongmadan FC na Pynursla hadien ba ka la lah ban pynliem noh ïa ka Backstreet J XI na Wahkdait lyngba ka tie-breaker da 3-1 kol.
Na ka liang ki bor pynïaid ki la pynbna ba ka jingïakhun final jong ka U-14 kan long ha ka sngi Thohdieng hapdeng ka Amkoi SC pyrshah ïa ka Nongbareh Lyntiar ha ka por 1 baje mynsngi bad ha kane ka sngi kan don artad ka bumper housie kaba T. 50,000 ka ticket kan long ha ka dor 400 shi sheet.
