Hyderabad, Lber:
U Myntri ka tnat Irrigation u N Uttam Kumar Reddy ha ka Sngi U Blei u la pynbna ba u Myntri Rangbah ka jylla Telangana u A Revanth Reddy un sdang noh ïa ka jingsam ïa u khaw ba bha (Sanna Biyyam) sha ki nongbat ïa ki White Ration Card ha Huzurnagar ha ka 30 tarik u Lber.
Ha ryngkat u Myntri ka R&B u Komatireddy Venkat Reddy bad kiwei kiwei ki nongïalam, ki la leit ban jngoh ïa ka Janapahad dargah kaba pawnam bha ha Palakeedu Mandal bad hadien ki la pynlong ïa ka jingïalang ban bishar bniah halor ki kam pynroi bad ka bha ka miat ha ka Nalgonda distrik barim.
Haba kren halor ka jingthmu sam khaw, u la ong ba kan ai jingmyntoi ïa ki 84% ki nongshong shnong jong ka Telangana bad kan ai hynriew kg u khaw ba bha na ka bynta uwei u briew man la u bnai. U la kynthoh ïa ka jingpynbiang jong ka sorkar barim ïa u khaw ba la khleh (Doddu Biyyam), da kaba kynnoh ba la pyndonkam bakla bad pynkylla sha ki kompeni beer bad ki jaka ri syiar. Da kaba khot ïa ka kum ka jingpynkylla kaba ai jingkyrshan kaba u la ong ba kane ka sienjam ka ïahap bad ka jingthmu jong ka Sonia Gandhi, President barim ka Congress, na ka bynta ka India kaba lait na ka jingkyrduh bam.
Halor ka jingai um, u Uttam Kumar Reddy u la kynnoh ïa ka sorkar BRS barim ba ka la ailad ïa ka Andhra Pradesh ban tan palat ïa ka um jong ka wah Krishna, kaba la wanrah ïa ka jingeh ha ki jaka pyllang um jong ka Telangana.
U la pynskhem ba ïa ki projek ai um kiba dang sahteng, kiba kynthup ïa ka Gandamalla, Brahmana Vellamla, Dindi bad Nellikallu, yn buh hakhmat eh, bad yn pynim biang ïa baroh ki Lift Irrigation System kiba hap hapoh ka projek Nagarjunasagar.
U la pynbna ruh ïa ka jingbishar bniah kaba ha khliehduh ïa ka projek jong ka Srisailam Left Bank Canal (SLBC), kaba la pynïaid da u Myntri Rangbah ka jylla ha ka lah ngi U Blei bad u la ong ba ki kam kin sa sdang biang shen.
U la leit ruh sha ki prokram Iftar ha Kodad bad Huzurnagar hadien. Wat lada la pynlong ïa ka jingjurip ha ka jylla baroh kawei da ki DM jong baroh 13 tylli ki distrik, hynrei ïa ki jinglap ym pat lah ban pynpaw paidbah.
