Raipur, Lber:
Ar bnai hadien ba la buh jingmudui da ka mukotduma bamsap pyrshah halor ka jingklop ïa ka pisa ba la ïathong da kaba shu Online ha ka app Mahadev, ka kynhun Central Bureau of Investigation (CBI) ha ka sngi Balang ka la pynlong ïa ka jingkhynra ha Chhattisgarh ha ki katto katne ki jaka, kynthup ruh ïa ka ïingsah jong u Myntri Rangbah barim ka jylla u Bhupesh Baghel, la ong ki briew kiba tip bha ïa kane ka jingjia.
Ka kynhun jong ka sorkar kmie ka dang toh-kit ïa ka jingïasuhbuit sniew kaba jur ha ka jingklop tyngka na ka jingïathong kaba la kot sha ka T. 6,000 klur. Kawei na ki lad pathai khubor kaba dei kaba nyngkong eh ban pyntip halor kane ha ka 21 tarik, Kyllalyngkot ba ka kynhun CBI ka la buh jingmudui halor ka jingkyrpad jong ka sorkar Chhattisgarh bad la ong ba u Baghel u don hapoh ka jingshah khmih bniah bad ka jingshah buddien.
Ka kynhun CBI ka la buh jingmudui da ka mukotduma kaba man ka por (lane ka kaiphod jingtip ba nyngkong) da kaba pynïasoh lang ïa ki 77 tylli ki jingujor ejahar na ki thanat pulit bapher bapher bad ka kynhun Economic Offences Wing (EOW) ha Chhattisgarh.
La jer kyrteng ïa u Baghel kum uba shah kynnoh ha ka ejahar ba la mudui da ki pulit ka Chhattisgarh ha ka 4 tarik u Lber, 2024, ryngkat bad u Sourabh Chandrakar bad u Ravi Uppal, ki nongseng jong ka Mahadev kiba la phet rieh ha kaba kumba la ïoh jingtip la ong ba ki la don mynta ha United Arab Emirates.
Ïa kane ka ejahar la shimti ruh da ka kynhun CBI.
U Baghel, u la ïada ïalade ha ka jingtohkit ha ka Mahadev kham shwa, kaba la pynlong da ka Enforcement Directorate (ED), da kaba ong ba ïa ka kyrteng jong u, la pynrung “da ka bor” da ka sorkar Bharatiya Janata Party (BJP) kaba synshar ha kane ka Jylla.
Kumba la ïathuh nyng-kong da ka lad pathai khubor, la ong ba ka sorkar Chhattisgarh ka la ai jingmut ban pynlong ïa ka jingtohkit da ka kynhun CBI halor ka mukotduma jong ka Mahadev ha u Nailar, 2024, kumba khyndai bnai hadien ba ka BJP ka la wan ha ka bor da kaba pynkynriah ïa ka Congress.
Hapdeng u bnai Nailar 2024 bad u bnai Kyllalyngkot, 2025, ka kynhun CBI ka la bunkam ha kaba pynïasohlang ïa ki kot ki sla kiba heh bha kynthup ïa ki ejahar, ki kot ki sla ba la mudui da ki pulit ka jylla, bad ki kot ki sla jong ka ïingbishar hadien kata la mudui ïa ka mukotduma ha u bnai Kyllalyngkot.
Ha ka mukotduma jong ka kaba la mudui ha u bnai Naitung, 2024, ka EOW jong ki pulit ka Chhattisgarh ka la pynpaw ba ka jingshakri jong ka Mahadev ka dang treikam, bad ki nongpyntreikam jong ka ki la ïoh ïa ka jingïada na ki pulit bad ki heh sorkar bapher bapher, kumjuh ruh na ki riew saiñ pyrthei kiba donbor ban khanglad ïa ka jingshah pynngat ha ka aiñ pyrshah ïa ki kam runar jong ki kiba ïadei bad ka jingïathong Online.
Ka kynhun ED, kaba dang pynlong ïa ka jingtohkit halor katei ka kam, ka la kynnoh ba u Chandrakar bad Uppal, ki la siew pisa pisa kaba kot sha ka T.508 klur, sha u Myntri Rangbah barim u Baghel.
Ka ejahar da ki Pulit ka Chhattisgarh kaba ai kyrteng ïa u Baghel, ha ka jingshisha, ka dei kaba la mudui halor ka jingpynshisha jong ka kynhun ED.
Ka tnad ka la kynnoh ba ka kynhun ba wanrah ïa ka ‘app’ ïathong ha ka Mahadev da kaba shu Online, kaba la sdang naduh u snem 2018 bad kaba la ïohi ïa u Chandrakar bad Uppal ba ki pynïaid na jngai ïa ki jingïathong be-aiñ, ha kaba ka jingmih na ki kam runar ka la poi sha ki katto katne hajar klur, ka la ailad ïa ki briew ban buh ïa ki jingïathong be-aiñ ha ki jingïalehkai kumba ka ïaid kum ka jingïalehkai Cricket, ka jingïalehkai Poker, badminton, tennis bad phutbol, bad wat la ailad ban rung sha ki apps ban buh jingïathong ha ki ilekshon ha India.
Ka kynhun ED ka la ong ha ka jingkynnoh kaba ar jong ka ba ka “kynhun ïalehkai” ka pyntreikam palat 3,200 tylli ki Panel (ban ïathong) ha ki nongbah bapher bapher, kiba pynmih haduh T.240 klur ha ka shisngi.
Ka kynhun ED ka la bynrap ha ka kot mudui jong ka ha u bnai Kyllalyngkot, 2024 ba “ki nongpynmih ïa ka Mahadev Online Book ki la ai wai ïa ki 20 tylli ki ïing ha Dubai ban pynsah ïa ki nongtrei jong ka kiba kynthup ïa ki 3,500 ngut.”
Haduh mynta ka kynhun ED ka la mudui ar tylli ki jingmudui ha katei ka mukotduma, kynthup ïa kawei pyrshah ïa u Chandrakar bad Uppal.
Ka la antad ba ka jingmih na ki kam runar ha katei ka mukotduma ka shongdor kumba T. 6,000 klur, na kine ki jingdon jingem kiba shongdor T. 2,426 klur ïa kiba la shah kurup noh, la kurup ne khang hapoh ka Prevention of Money Laundering Act (PMLA).
