Bengaluru, Risaw:
U Deputy Chief Minister u Dr G Parameshwara uba bat ruh ïa ka tnad khajna, u la ong ba ka sorkar jylla ka la pyllait T.1,250 klur kum ka bhah ba nyngkong eh jong ka jingïarap ïa ka jingkyrduh um ban kyrshan ïa ki nongrep kiba shah ktah ha ka jingkyrduh um kaba la don mynta.
Ha ka sngi Balang, u Symbud Myntri Rangbah ka jylla u la jurip ïa ki lyngkha soh ba la shah ktah ha ka jingtyrkhong um ha ka shnong Pothalakatte ha ka thaluk Hosapete bad u la ïakren bad ki nongrep.
“Haduh 217 tylli ki Taluk la dep pynbna ba ki la shah ktah ha ka jingkyrduh um, katba ka jingpynbeit thymmai ïa ka khyndew ka dang ïaid shakhmat ha ki 23 tylli ki Taluk kiba dang sah. Sa 10 haduh 15 tylli ki Taluk ki lah ban shah pynrung ha ka thup jong ka jingkyrduh um shen,” u la ong.
Hapoh ka bhah kaba nyngkong, ki nongrep kiba dei hok kin ioh T.2,500 marwei beit beit sha ka Bank Account jong ki hapoh ar ne lai sngi ban wan, katkum ki kyndon ba la buh, u la pyntip.
“Ka sorkar jylla ka la pynlut T.306 klur ban pynthikna ïa ka jingpynbiang ïa ka umbam umdih bad ka la buh T.329 klur ha ki Personal Deposit Account jong ki Deputy Commissioner na ka bynta ki lad jingïarap ba kyrkieh.
Sa 25 klur la pyllait na ka bynta ka jingpynïaid ïa ki jingbam jong ki jingri. Ki DC ki la shah ithuh ban plie ïa ki jaka ri ïa ki masi bad ki jaka buh jingbam katba i donkam,” u la ong.
U Symbud Myntri Rangbah u la ong ba ka jingkheiñ ba nyngkong ka buh ïa ka jingduhnong ha ka jingthung jingtep bad ki mar ki mata ha ka jylla haduh T.50,000 klur haduh T.60,000 klur.
Ka jylla ka la pan haduh 10,000 klur haduh 11,000 klur tyngka na ka sorkar pdeng katkum ki kyndon jong ka NDRF.
Ki kynhun peit bniah ïa ka jingkyrduh um jong ka sorkar pdeng ki la dep ban leit jngoh ïa ki katto katne ki bynta jong ka jylla bad la khmih lynti ba shen kin sa aiti ïa ka kaiphod jong ki, la ong u Myntri.
U Dr. Parameshwara u la ong ba ka kynhun jong baroh ki seng hapoh ka jingïalam u Myntri Rangbah ka jylla u DK Shivakumar kan leit sha New Delhi ban ïakynduh ïa u Myntri Rangbahduh ka ri, Myntri ka tnat ki kam pohïing ka sorkar pdeng bad Myntri ka tnad ka rep ka riang bad ban batai halor ka jingjur ka jingrang tyrkhong.
Yn khot ruh ïa ki nongïalam jong ka Liang Pyrshah ban ïadon bynta lang ha kane ka kynhun, u la ong.
U la ong ba ka sorkar kan bteng ban pyntreikam ïa ki skhim Guarantee jong ka bad kan ym khang ïa ki na kano kano ka daw. Ïa kane ka Hampi Utsav kaba pawnam yn rakhe ruh ha ka rukom kaba heh kum ka Mysuru bad Tumakuru Dasaras, u la ong.
U Myntri ka tnad ka rep ka riang jong ka jylla Karnataka, u PM Narendraswamy, u lah ban aiti ïa ka jingthoh jingkynmaw, kaba pan jingïarap na ka jingtyrkhong kaba shipor, sha u Myntri ka tnad rep jong ka sorkar pdeng, u Shivaraj Singh Chauhan, ha New Delhi ha ka lah sngi U Blei.
Ka kynhun pdeng kaba la aiti ban bishar bniah ïa ka jinglong jingman jong ka jingkyrduh ha ka jylla ka la pyndep ïa ka kam jong ka bad la khmih lynti ba kan aiti ïa ka kaiphod jong ka sha ki bor ba dei peit ha ka sorkar pdeng.
Ka sorkar jylla ka la dep ban aiti ïa ka jingkheiñ jong ka, kaba la antad ba ka jingduhnong kaba ïadei bad ka jingkyrduh um ka long kumba T.46,000 klur.
Ka pan jingïarap pisa haduh kumba 10,000 klur tyngka na ka sorkar pdeng. Uwei u heh sorkar u la ong ba ki la aiti ïa ka jingkynmaw da kaba kdew ïa ka jinglong jingman ha ki 177 tylli ki taluk. Ka lah ruh ban ïakynduh ïa u Myntri ka tnat ki kam pohïing u Amit Shah ha ka taïew ban wan.
