Shillong, Lber 26
Ka Combine SHG bad ka PHE Sohra Division ki la lah ban pynthikna ïalade ban jam sha ka semi final jong ka Inter Office Cum Corporate League T20 Cricket Tournament 2025 ba la pynïaid da ka East Khasi Hills Cricket Association.
Ha ka jingïakhun kaba khatduh kaba ka long ha ka Sngi Balang ha madan Saitsohpen kaba ha Sohra, ka Combine SHG ka la pynliem noh ïa ka SSA Shella Bholaganj da 8 wiket. Ka SSA Shella Bhologanj ka la jied ban tied nyngkong ha kaba ka la ïoh 63 run bad shah pynhap 10 wiket ha ki 16.1 over. U Ritchie Diengdoh u la tied 17 run na ki 23 bol. Katba u Sunny Sten u la shim 4 wiket na ka bynta 10 run ha ki 4 over.
Haba wan shimti ïa ka pali ba ar ka Combine SHG ka la lah ban kynjoh sha ka thong ha ki 10.1 over hadien ba ka la ïoh 66 run bad shah pynhap 2 wiket. U Banphira Basaïamoit u la tied 28 run na ki 31 bol. Katba u Païamawshai Nongkynrih u la shim 2 wiket na ka bynta 1 run ha ki 1 over. Ïa ka nam ‘Player of the Match’ la ïohpdiang da u Sunny Sten.
Haba phai sha kawei pat ka jingïakhun ba ar ka PHE Sohra Division ka la jop da 3 wiket ïa ka Exporter XI. Ka Exporter kaba la kam trai ban tied nyngkong, ka la ïoh 169 run bad shah pynhap 10 wiket ha ki 20 over. U Shubro Sarkar u la khyrwit ïa ka shiteng spah kaba 72 run na ki 39 bol. Katba u Marken B Kharkongor u la shim 5 wiket na ka bynta 31 run ha ki 4 over.
Ka PHE Sohra Divi-sion haba wan shimti ïa ka pali ba ar, ka la lah ban kynjoh sha ka thong da kaba ïoh 170 run bad shah pynhap 7 wiket ha ki 20 over. U Sandy Kharshandi u la khyrwit marwei ïa ka spah run kaba 106 na ki 56 bol bad u la ïohpdiang ruh ïa ka nam Player of the Match.
Ka jingïakhun semi final kan long ha ka sngi Thohdieng (28 tarik) hapdeng ka MLP Sohra pyrshah ïa ka Combine SHG, Sohra ha ka por 9 baje mynstep, katba ka Ribhoi Office Combine ïa ka PHE Sohra Division ha ka por 12:30 mynsngi.
