Raipur, Lber:
Ki la don lai ngut ki dkhot jong ka kynhun lehnoh CPI (Maoist) kiba la ïap ha ka jingïasiat markylliang bad ki bor pahara ha ka Chhattisgarh, kaba la shah pynjulor ha ka jingïakynad ha ka District Dantewada, kaba jngai kumba 450 km shaphang Shathie jong ka Raipur, ha ka sngi Ba-ar, ong ki pulit jong ka Bastar.
“Da kaba pynshong nongrim ha ki jingtip ba kyrpang ba la ïoh halor ka jingdon jong ki lehnoh Maoist ha ki jaka khlaw jong ki shnong Girsapara, Nelgoda, Bodga bad Ikeli kiba don hajan ka jaka khappud hapdeng ki distrik jong ka Dantewada-Bijapur, ka kynhun jong ki shipai Dantewada District Reserve Guards (DRG) bad ki shipai ïakhun ka Bastar ki la sdang ïa ka jingkhynra ban ïakhun pyrshah ïa ki Maoist. Ha ka por kumba 8 baje mynstep, ka jingïasiat kaba markylliang ka la mih hapdeng ki lehnoh bad ki bor pahara. Haduh mynta, la ïoh tam lai tylli ki met ïap jong ki Maoist shynrang bad ki tiar siati nalor ki tiar pynbthei”, la ong u Gaurav Rai, uba long u heh pulit jong ka Dantewada.
Ki tiar ba la ïoh kurup na kane ka jaka ki kynthup ïa ka suloi INSAS, ka suloi 303, ki tiar pynbthei nalor ki tiar ba pyndonkam man ka sngi.
Uwei na ki Maoist uba la shah pynïap u dei uba la tip kyrteng kum u Sudhir, ïa uba la tip ruh da ka kyrteng kum u Sudhakar bad kum u Murli uba sah ha Warangal ha Telangana. Une u lehnoh u la shah thong da ka khusnam ha ka khlieh jong u da T.25 lak bad u dei u dkhot ba trei shitrhem jong ka Dandakaranya Special Zonal Committee jong ka CPI (Maoist). Ïa kiwei pat ki ar tylli ki met ïap ym pat lah ban ithuh. Ka jingthwet ïa ki Maoist ka la nang jur ha kane ka thaiñ, kaba la ju shim ba ka dei ka jaka rieh jong ki.
Ym pat don kano kano ka khubor ba ki bor pahara ki la mynsaw ha katei ka jingïasiat kaba markylliang. Mynta u snem, ki don 116 tylli ki met ïap jong ki lehnoh Maoist, kiba la ïoh tam haduh mynta ha ki jingïasiat ba markylliang ba la jia ha ki jaka bapher bapher ha Chhattisgarh, kynthup ïa ki 100 ngut kiba la shah pynïap ha Bastar. Ka jingïakhun ha ka sngi Ba-ar ha Dantewada ka dei kaba ha ka sien kaba saw pyrshah ïa ki Maoist mynta u bnai ha ka Bastar Division.
U Myntri ka tnat ki kam pohiing jong ka sorkar pdeng, u Amit Shah, u la pynbna ba ka ri, kan long kaba lait na ki Maoist, ha ka 31tarik, Lber, 2026. Ka jingbud ryntih jong ki jingïakhun pyrshah ïa ki lehnoh ka dang sah kum ka bynta jong ka buit thymmai ban pynlait ïa ka jylla Chhattisgarh, na ka jingshah ktah ha ki Maoist.
Ka Dantewada, kaba dei napdeng ki hynñiew tylli ki distrik, kiba la shah ktah ha ki Maoist ha Bastar zone, ka dei kaba la shim ba ka dei ka jaka pdeng jong ki lehnoh ha ka thaiñ Shathie jong ka Chhattisgarh.
