Shillong, Lber 27
Hadien phra sngi ka jingïalehkai kaba itynnad jong ka Khelo India Para Games, ka la poi noh sha kaba kut ha ka Sngi Palei ha kaba ka Haryana sa shisien ka la bat biang kum ka lahduh hadien ba la lah ban khur 34 tylli ki takma ksiar, katba ka Tamil Nadu (28 takma ksiar) bad ka Uttar Pradesh (23 ki takma ksiar) ki la wan ba-ar bad balai.
Ha kane ka lympung ki la don haduh 1300 ngut ki nongïalehkai ba la pynïalehkai ha hynriew tylli ki jait jingïalehkai ha ki lai tylli ki jaka ha nongbah Delhi kata ka Jawaharlal Nehru Indoor Stadium, IG Indoor Stadium bad ka Karni Singh Shooting Range.
Ka Khelo India Para Games 2025 ka la sakhi ïa ki jingsah kynmaw, kiba pynpaw ïa ka jingshah shitom, ka mynsiem bym lah ban pyndem, bad ka mon ba jwat jong ki nongïalehkai ban jop ïa kino kino ki jingeh.
Ha kane ka KIPG 2025 la lah ban thaw haduh 18 tylli ki rekod hapoh ka ri lyngba u Jaspreet Kaur (Punjab), Manish Kumar (Haryana), Seema Rani (Punjab), bad u Jhandu Kumar (Bihar) ki la khur takma ksiar ha ka Para Powerlifting.
Nalor kata, ki don 14 ngut ki nongïalehkai( track and field) kata u Dilip Mahadu Gavit (Maharashtra), Sharath Makanahalli Shankarappa (Karnataka), Manish Kumar (Har-yana), Manjeet (Haryana), Bhavani Munniyandi (Andaman & Nicobar Islands), Lalitha Killaka (Andhra) Nadu), Keerthika Jayachandran (Tamil Nadu), Lakshmi (Haryana), Usha (Haryana), Dolly Gola (Del-hi), Jaspreet Kaur Sran (Punjab), bad ka Fatima Khatoon (Uttar Pradesh) ruh ki la pynpra ïa ki rekod ha kane ka lympung.
Da kaba don 12 ngut ki nongïalehkai kynthei kiba la lah ban pynpra ïa ki rekod jong ka ri, ka KIPG 2025 ka la pynpaw ïa ka jingroi jong ki nongïalehkai kynthei ha India ha ki jingïalehkai para. La sam haduh 596 tylli ki takma (189 tylli ki takma ksiar, 189 tylli ki takma rupa, 218 tylli ki takma) ha kaba kut jong kane ka lympung ïalehkai ki la ïoh ban khur haduh 346 tylli ki takma (110 tylli ki takma ksiar, 109 tylli ki takma rupa, 127 tylli ki takma) kiba la khur da ki nongïalehkai shynrang bad kynthei ïa ki 250 tylli ki takma (79 ksiar, 80 rupa bad 91 ki rnong).
Kumba long ha ka KIPG ba nyngkong ha u Nohprah 2023, ka Haryana sa shisien pat ka la jop da kaba khur 104 tylli ki takma (34 tylli ki takma ksiar, 39 tylli ki takma rupa, bad 31 tylli ki takma rnong). Ha ka lympung ïalehkai kaba nyngkong ka Haryana ka la khur 105 tylli ki takma (40 tylli ki takma ksiar, 39 tylli ki takma rupa bad 26 tylli ki takma rnong).
Ha kawei pat ka liang ka Tamil Nadu kaba la wan balai ha ka KIPG kaba nyngkong, ka la wan ha ka kyrdan ba-ar da kaba khur 74 tylli ki takma (28 tylli ki takma ksiar, 19 ki rupa bad 27 tylli ki rnong), katba ka Uttar Pradesh kaba la wan ba-ar ha u snem ba la lah, ka la wan ha ka kyrdan kaba lai da kaba khur 64 tylli ki takma (21 tylli ki takma ksiar, 21 ki rupa bad 20 ki rnong).
Ha kane ka sngi kaba khatduh ha ka sngi Palei, ka Gujarat ka la lah ban pynpaw ïa ka jingtbit ha ka jingïalehkai table tennis ha Indira Gandhi Stadium. Ka Gujarat ka la khur 21 tylli ki takma, ba kynthup ïa 4 tylli ki takma ksiar, 5 ki rupa lem bad 12 tylli ki rnong. Ka Haryana ka la jop baroh 8 tylli ki takma kynthup ïa lai tylli ki takma ksiar.
