Jerusalem, Lber:
Ka Hamas ha ki khyndiat sngi ba la leit, ka la pyllait ia kawei ka durkhih kaba la pyni ia ar ngut ki briew jong ka Israel kiba la shah rahbor bad kiba dang don ha ka kti jong ki lehnoh Hamas naduh ka 7 tarik u Risaw 2023 ba ki la shah rahbor sha Gaza.
Ha katei ka durkhih kaba tang kumba 3 minit eiei kaba ia ka tarik ba la pyllait ym lah ban pyntikna, la iohi ia kitei ki ar ngut kiba shong ha ka madan jong kawei ka kamra bad ki iakren ha ka ktien ‘Hebrew’.
Ka tnat AFP ka la pynithuh ia kitei ar ngut kum u Elkana Bohbot bad u Yosef Haim Ohana, bad baroh ar ngut la ong ba ki la shah rahbor na ka jaka ba pynlong ia ka ‘Nova Music Festival’.
Ki bahaiing jong u Bohbot ki la pynpaw ka jingsngewkhia kaba jur tang mar ia iohi ia katei ka durkhih bad kumta ruh ki la kyrpad jur ia u Myntri Rangbahduh ka Israel- u Benjamin Netanyahu bad ia u President ka US- u Donald Trump ban ym pynslem shuh ban ialeh ban pyllait noh mar-mar ia kitei ki 2 ngut kiba dang don ha ka kti jong ka Hamas.
Ha katei ka durkhih, la ong ba kitei ar ngut ki nong Israel ki kren shaphang ka jingma ba ki la dep ban ïaid lynti baroh shi katta bad ka jingma kaba ap ia ka jingim jong ki lada kim lah ban lait noh na ka kti jong ki lehnoh Hamas. Namarkata, ki bahaiing jong kitei ar ngut ki la kyntu jur ia ka sorkar Israel ba kan ialeh katba lah ban pyllait bad pynpoi iing noh ia kitei ki ar ngut ha ka por kaba tang khyndiat eh.
