Shillong, Lber 27
U nongtied ba kynsai, Shreyas Iyer un pynkhreh ban ïoh biang ïa ka jingïateh soskular bad ka BCCI ynda la pynbna ïa ka thup ba pura jong ki nongïalehkai na ka bynta ka samoi ïalehkai 2024-25 ha kane ka taïew.
La ïathuh ba u secretary ka BCCI, Devajit Saikia, un ïakynduh ïa u coach jong ka India, u Gautam Gambhir, uba dang don hapdeng ka jingleit kai mynta sha France ryngkat bad ka ïing ka sem hadien ba u la lah ban pynurlong ïa ka India ban rah ïa ka nam lahduh ICC Champions Trophy 2025 bad u Ajit Agarkar, u nongjied rangbah un don ha Guwahati ha ka 29 tarik mynta u bnai na ka bynta ban ïakren halor ki kontrak jong ki nongïalehkai.
Kumba ka paw ka Guwahati kan pynkhreh ïa ka jingïalehkai IPL hapdeng ka Rajasthan Royals bad ka Chennai Super Kings ha ka 30 tarik mynta u bnai, kata hadien shi sngi ka jingïalang ban ïamir jingmut halor katei ka bynta.
Ha kine ki lai sngi ba la leit ka BCCI ka la dep ban pynbna ïa ka kontrak na ka bynta ki ‘thei ïalehkai kriket.
Katba u Iyer u dang thmu ban ïoh biang ïa ka jingïateh soskular jong u bad ka BCCI, kiei-kiei kim long kiba thikna bha na ka bynta u Ishan Kishan, uba la shah weng noh na ka thup jong ki nongïalehkai ba don ïa ka jingïateh soskular na ka bynta ka samoi ïalehkai 2023-24 ha u snem ba la dep, namar ba baroh ar ngut ki nongïalehkai ki la lyndet ïa ki jingïalehkai hapoh ka ri wat hapdeng ki jingbthah kiba shai na katei ka synjuk ïalehkai ba hakhlieh duh jong ka ri.
“U Shreyas u la thmu ban ïoh biang ïa ka jingïateh jong u, bad kan don ha ka kyrdan ba ha khlieh duh. Hynrei ka jingïakren ka dang ïaid shakhmat halor u Ishan,” la pynpaw ki tyllong khubor.
U Iyer u dei u nongïalehkai ba bun ron tam na ka bynta ka India ha ka jingïakhun jong ka jingjop jong ka India ha ka Champions Trophy 2025 kaba la kut dang shen, ha kaba u la kamai 243 ron ha ki san tylli ki jingïakhun ryngkat ar tylli ki shiteng spah run, bad u dei shi bynta ba kongsan jong ka kynhun ïalehkai ODI jong ka India, katba u Kishan u la ïalehkai bha ha ka sien kab nyngkong na ka bynta ka Sunrisers Hyderabad ha ka jingïalehkai IPL 2025 kaba la long ha ka 23 tarik mynta u bnai, da kaba u la kamai 106 run (not out) na ki 47 bol pyrshah ïa ka Rajasthan Royals.
Kawei pat ka mat kaba kongsan kaba la ïakren ka long hato yn bat ne em ïa u kapten ïalehkai ka ODI bad Test jong ka India, u Rohit Sharma, u nongtied ba kynsai u Virat Kohli, bad u Ravindra Jadeja, ha ka kyrdan A+ ba hakhlieh duh jong ki jingïateh soskular, wat la ki la shongthait noh na ka jingïalehkai T20I.
Hynrei ka tyllong khubor na ka BCCI ka la pyntip ba “baroh lai ngut yn bat ha ka kyrdan kaba hakhlieh duh, ryngkat bad u Jasprit Bumrah.”
