Shillong, Lber 30
Ka Confederation of Brazilian Football (CBF) ka la pynbna ba ka la weng noh ïa u Dorival Junior na ka kam kum u coach jong ka Brazil hadien ba kane ka kkynhun ka la shah rem da 4-1 ha ka Argentina ha ka lympung ïaknieh rung FIFA World Cup ha ki lai sngi ba la lah.
Ka Brazil kaba la jop san sien ha ka World Cup, ka don mynta ha ka kyrdan kaba saw ha ka thup ïakhun jong ka South America, bad hadien ïa ka Argentina, kaba la bat teng ïa ka nam lahduh, kaba la tam da 10 poiñ ïa ka Ecuador bad Uruguay. Ka Argentina ka la pyntikna ba kan rung sha ka World Cup hadien bal ka la lah ban pynliem ïa ka Brazil.
“U Dorival Junior um long shuh u coach uba la khmih ïa ka kynhun ïalehkai jong ka Brazil. Ki bor pynïaid ki ai khublei ïa u bad ki kitbok kitrwiang ïa u ba un nangjam shaphrang ha ka jingim jong u,” la ong ka kyrwoh lyngba ka CBF.
U Dorival, uba la 62 snem ka rta, u la shimti ïa ka kam kum u coach naduh u Kyllalyngkot jong u snem 2024, da kaba bujli ha ka jaka u coach ba shipor u Fernando Diniz. Hynrei ka por jong u ka la long kaba la pynpaw ba ka jingbym lah ban ïalehkai bha ha ki jingïalehkai ban ïaknieh rung World Cup 2026 ka ban sa long ha America, Mexico bad Canada.
Ki jingïalehkai ban wan jong ka Brazil kan long shabar na la ïing pyrshah ïa ka Ecuador bad ka jingïalehkai ha la ïing pyrshah ïa ka Paraguay, kaba la buh ban long ha ka 4 tarik bad 9 tarik u Jylliew.
“Ym don ba khmih lynti ïa kaei kaba ngi la ïohi mynta ka sngi (pyrshah ïa ka Argentina), bad ka jingkitkhlieh ka dei jong nga baroh kawei”, la ong u coach ka Brazil hadien ka jingshah rem.
U Dorival u la shimti ïa ka jinglong nongïalam jong ka Selecao hadien ka jingjop jong u ha kaba u la lah ban pynurlong ban rah ïa ki nam lahduh bad ka Flamengo bad ka Sao Paulo.
Kat kum ki khubor ha Brazil la ong ba u Ancelotti u danglong u kyrtong ban bujli ha ka jaka u Dorival, ryngkat bad u Jorge Jesus na Portugal uba pynïaid mynta ïa ka Al Hilal ha Saudi Arabia.
Uwei pat u coach na Portugal, u Abel Ferreira, uba la lah ban pynurlong ïa ka jingjop na ka bynta kynhun ïalehkai jong ka Brazil, ka Palmeiras, u la don ha kane ka thup ban shimti ïa katei ka kam.
Hynrei u Ancelotti u don ka jingkyrmen ba un pyndep ïa ka por jong ka jingïateh kular jong u ha Madrid kaba long haduh u Jylliew jong u snem 2026.
Ka jingkitkhlieh ba hakhmat eh jong une u nongpynïaid ba dangwan kan long ban pynkhie biang ïa ka rukom ïalehkai ka Brazil bad ban pynthikna ïa ka jingjop ba nyngkong jong ki naduh ba ki la ïoh ban khur ïa ka Copa America ha u snem 2019.
