Stockholm, Lber:
Uwei u nongthoh khubor jong ka Sweden, Joakim Medin, u la shah kem noh ha ka por ba u dang leit poi ha Turkey ha ka Sngi Palei ban leit sakhi da lade bad ban thoh khubor shaphang ki jing-iakhih ha surok jong katei ka ri bad la ong ba utei u nongthoh khubor u la shah kem bad shah set patok noh khlem da pynslem ne ailad ia u ban pynpaw ia la ka jingsngew.
Haba kylli la u Medin u la shah set patok ne em, u heh jong ka Dagens ETC u Andreas Gustavsson u la ong ha ka khubor lyngba ka jingthoh, “Ka long kaba dei”, da kaba bynrap ba “ngim pat ioh jingtip shaphang ki jingshah kynnoh ba shisha haduh mynta”.
U Medin u la shah kem ha ka por ba u hiar ha Turkey ha kaba u dang thmu ban leit wad jingtip bha bad ban ioh ban thoh khubor ïa ki jingïakhih pyrshah sorkar ha katei ka ri, ong ka Maria Malmer Stenergard, Myntri kam bar ri jong ka Sweden, ha ka social media, da kaba bynrap ba ma ka bad ki paralok jong ka, “ki ju shim khia bha haba ki nongthoh khubor ki shah set”.
Ki lad pathai khubor jong ka Turkey ki la ong ba u Medin u la shah kynnoh ba u la “kren bein ia u President jong katei ka ri”, u Recep Tayyip Erdogan bad ba u dei u “dkhot jong ka seng lehnoh ba don tiar ialeh”.
“Nga tip ba kitei ki jingkynnoh ki dei kiba bakla, 100% ki long kiba bakla”, la thoh u Gustavsson ha ka rynsan ‘X’ lyngba ka jingpyllait na ka ‘Account’ jong u.
Ka Turkey, ka la pynjur shuh shuh ia ka jingpynshitom ia ki jingiakhih pyrshah sorkar, kiba la mih hadien ba la kem bad set phatok ia u nongmihkhmat jong ka liang pyrshah ba pawnam jong ka Istanbul, u Ekrem Imamoglu.
Palat 1,879 ngut ki briew kiba la shah kem naduh ka 19 tarik u Lber, ong u Myntri kam pohïing jong ka Turkey, U Ali Yerlikaya, ha ka Sngi Thohdieng.
Ki pulit ki la kem ruh ïa arngut ki nongthoh khubor kynthei na Turkey ha ka jingkhynra mynstep ha ki ïing jong ki, la ong ka TGS ha ka Sngi Palei.
Kane ka jingleh ka la jia tang katto katne kynta hadien ba ki bor synshar ki la pyllait ïa u nongthoh khubor ba khatduh na ki 11 ngut kiba la shah kem ha ki jingkhynra mynstep ha ka sngi Nyngkong namar ba ki la leit ban thoh khubor shaphang ki jingïakhih paidbah ha katei ka ri.
