Bengaluru, Lber:
Ka seng ka liang pyrshah ka BJP kan pynlong ïa ki jingïakhih pyrshah ïa ka jingkiew dor jong ki marbam ha ka jylla bad ka jingshah khang jong ki MLA ka seng ban leit sha ïingdorbar thawaiñ haduh hynriew bnai.
Haba pynpaw ïa kane sha ki nongthoh khubor ha ka sngi Saitjaiñ, u President ka BJP ha ka jylla u BY Vijayendra u la ong ba ka jingïakhih shong kyllaiñ mynmiet kan long ha Freedom Park hangne ha ka 2 tarik, Ïaïong, ka ban sdang naduh ka por 11 baje mynstep. Baroh ki MLA, ki MLC jong ka BJP, ki nongthaw aiñ barim, ki President jong ki distrik unit, bad ki nongkitkam jong ka jylla kin ïashim bynta ha kane ka jingïakhih.
Yn pynlong ruh ïa ki jingïakhih ha ki jaka treikam jong ki distrik ha ka 4 tarik u Ïaïong bad ha ki Taluk ha ka 5 tarik u Ïaïong. La pynkiew ïa ka dor um bad bording, kumjuh ruh ïa ka dor dud bad umphniang kali. Ka sorkar Congress ka la ai jingkular halor kine ki jingkiew dor, la ong u Vijayendra.
Ha ka 2 tarik, Ïaïong, baroh ki MLA bad MLC ka BJP kin pynlong ïa ka jingïakhih hajan ka Vidhana Soudha bad kin aiti ïa ka dorkhas sha u Lamphang ka ïingdorbar pyrshah ïa ka jingshah sospon jong ki 18 ngut ki MLA ka BJP na ka bynta 6 bnai. Ka jingshah sospon ki MLA ka BJP ka dei ka rai leh donbor bad ka jinglehibeiñ ïa ki nongthep vote. “Ki MLA bad ki MLC ka BJP kin khanglad ïa ki jingïalang jong ki komiti tad haduh ba u Lamphang un weng noh ïa ka hukum ban khang ïa ki”, u la ong.
Haba ther ïa ka sorkar kaba la pynjlan ïa ka jingbuh kyrpang ïa ki Muslim ha ki kontrak sorkar na ka bynta ki kam paidbah, u Vijayendra u la ong ba hadien ka 10 tarik u Ïaïong, ki nongïalam ka BJP kin leit sha baroh ki distrik ban pynsngewthuh ïa ki paidbah ban pyrshah ïa kane ka jingleh.
Halor ka jingshah beh seng jong u MLA u Basangouda Patil Yatnal na ka seng, u Vijayendra u la ong ba ki nongïalam ka sorkar pdeng ka BJP ki la pynmih bun tylli ki jingpynbna sha u Yatnal, da kaba maham ïa u ba um dei ban ïaid pyrshah ïa ka jingmyntoi jong ka seng. Kum u President ka BJP jong ka jylla, u (Vijayendra) u la pyrshang ban pynbeit ïa ki jingïapher jingmut ba u Yatnal u don bad u bad kiwei kiwei ki nongïalam ka seng.
“Ha ka dorbar ba dang shen hah Assembly kaba dang shen, nga la khot ïa u sha ka jingïalang bam ja miet kaba la pynlong na ka bynta ki nongïalam ka seng bad wat nga la ong ïa u ba ngin pynbeit ïa kino kino ki jingïapher jingmut, lada don. Nga kham rit ïa u (Yatnal) ha ka rta bad ka jingshemphang. Kum u President ka BJP jong ka jylla, ka dei ka kamram jong nga ban ïalam lang ïa baroh.
U la pynpaw ba, na ka bynta ka jingmyntoi jong ka seng, u la shah wat ïa ki jingshah lehbeiñ kiba la leh pyrshah ïa ki heh nongïalam kum u BS Yediyurappa, uba la pynsan pynrangbah ïa ki dkhot jong ka seng khlem da pynjah burom ïano ïano ruh. “Kam dei ka rai jong u Yediyurappa lane u Vijayendra. Ki nongïalam ka seng kmie ki la shim ïa ka”, u la ong haba jubab ïa ka jingkylli.
Ki nongïalam jong ka sorkar kmie jong ka seng ki la peit bniah da ka jingsbun ïa ki jingjia ha ka jylla bad ki la rai ban sdang ïa ka jingpynshitom, la ong u Vijayendra. U la bynrap ruh ba ka kamram jong u ka long ban wanrah ïa ka BJP ha ka bor synshar ha Karnataka da lade bad u la kyntait ïa ki jingkynthoh halor ka jingkwah jong u ban long CM.
U la kyntait ban kren eiei halor ka jingkren jong u Yatnal shaphang ka jingwanphai biang sha ka seng.
