Shillong, Ïaïong 01
U manager ka Manchester City, Pep Guardiola u la pynpaw ba u lah ban pynïalehkai ïa ka kynhun khlem u Erling Haaland haduh hynñiew taïew hadien ba u la mynsaw ha kaba katei ka kynhun ka la jop da 2-1 kol ïa ka Bournemouth ha ka quarter final jong ka FA Cup ha ka Sngi U Blei.
U Haaland u la mynsaw hadien ba u la ïatyngkhuh bad u Lewis Cook jong ka Bournemouth, hadien ba u la pynïakhaid na ka bynta ka kynhun lajong ha katei jingïalehkai.
“Na ka liang ki nongsumar ki la ïathuh ïa nga ba hapdeng san bad hynñiew taïew, kumta kyrmen ba ha kaba kut jong ka samoi ngi lah ban long kiba la pynkhreh,” ong u Guardiola.
U Guardiola u la bynrap wat la um don ïa u nongïalehkai ba lah ban bujli ha ka jaka u Haaland uba la thep 30 sien ha baroh ki jingïalehkai mynta ka samoi, hynrei un hap ban pynïahap ïalade bad ka jinglong jingman ha kaba ka samoi kan nang kylla.
“Ngim don sa uwei pat u nongïalehkai uba don ïa ka jingtbit kum une ki jinglong ba kyrpang jong u. Ngi tip ïa kata, hynrei ngi hap ban pynïadei dur,” la ong une u manager uba na Spain.
U Guardiola u la pynpaw ïa ki por ba ka kynhun jong u ka la hap ban ïakynduh ïa ki jingeh kiba kum kine bad u la pynkynmaw ba kum ka kynhun jong u ka hap ban mad ïa kine jingeh.
“Ha ki bun tylli ki snem ngi la ïalehkai ha ki rukom bapher bapher. Ka shong ha ka jinglong jong ki rangïalehkai. Ngin sa pyrshang ban wad ïa ka lad ban weng ïa kine ka jingeh,” u la bynrap.
Kumba ka long mynta ka Manchester City, kaba la bat ïa ka nam lahduh ha ka Premier League, ka la hap ban mad ïa ka samoi ïalehkai kaba eh bha namar ba ka dang don ha ka kyrdan kaba san ha ka miej kheiñ poiñ ryngkat 48 poiñ na 29 tylli ki jingïalehkai ha kane ka aïom ïalehkai. Kane ka kynhun ka la jop 14 sien, katba ka la shah rem 9 sien bad ïakhaid 6 sien.
Te kumta ka City kan pynkhreh ban ïakhun pyrshah ïa ka Leicester ha ka 3 tarik mynta u bnai shwa ba kan ïakynduh sa ïa ka Manchester United ha Old Trafford.
